काठमाडौं, फागुन ८ । प्रमुख निर्वाचन आयुक्त दिनेशकुमार थपलियाले राष्ट्रपति र उपराष्ट्रपतिको निर्वाचनको मतभार २०११ को जनगणनाको नतिजाका आधारमा हुने बताएका छन्।
सोमबार नयाँ बानेश्वरस्थित इन्टरनेशनल कन्भेन्सन सेन्टरमा राष्ट्रपति र उपराष्ट्रपतिको निर्वाचनका लागि निर्वाचन अधिकृतको कार्यालय स्थापनापछि बोल्दै प्रमुख निर्वाचन आयुक्त थपलियाले राष्ट्रपति र उपराष्ट्रपतिको निर्वाचनको भोटिङको आधारमा मतभार निर्धारण गरिने बताए।
उनले एक दशकअघि भएको जनगणनाका आधारमा राष्ट्रपति र उपराष्ट्रपतिको निर्वाचनसम्बन्धी कानूनको अनुसूची १ मा उल्लेख भएको मतको वजनका आधारमा निर्वाचन हुने स्पष्ट गरे ।
निर्वाचन ऐनमा भर्खरै सम्पन्न जनगणनाको नतिजाका आधारमा भोटको तौल निर्धारण गर्ने व्यवस्था भए पनि आयोगले २०२१ को जनगणनाको आधिकारिक नतिजा नआएकाले २०११ को जनगणनालाई आधार मान्नुपरेको उनले बताए । चैत २१ गते हुने निर्वाचनका लागि दुईवटा मतदान केन्द्रको व्यवस्था गरिएको प्रमुख निर्वाचन आयुक्त थपलियाले जानकारी दिए । थपलियाका अनुसार प्रतिनिधिसभा सदस्य र प्रदेशसभा सदस्यका लागि छुट्टाछुट्टै मतदान केन्द्रको व्यवस्था गरिएको छ ।
