काठमाडौं, साउन २९ । सरकारले नागढुंगा सुरुङमार्गको उपभोग दस्तुर तोकेको छ ।
साउन २६ गते बसेको मन्त्रिपरिषद् बैठकले यो शुल्क तोकेको सरकारका प्रवक्ता एवम् सूचना तथा सञ्चार प्रविधिमन्त्री पृथ्वीसुब्बा गुरुङले बिहीबार आयोजित पत्रकार सम्मेलनमा जानकारी दिए ।
बैठकको निर्णयअनुसार नागढुंगा सुरुङमार्गबाट कार/भ्यानले काठमाडौं आउँदा ६५ रुपैयाँ र बाहिर जाँदा ६० रुपैयाँ तिर्नुपर्नेछ ।
यसैगरी मिनी बस/ट्रक काठमाडौं आउँदा ११५ रुपैयाँ र बाहिर जाँदा ८० रुपैयाँ तिर्नुपर्छ । बस/ट्रक काठमाडौं आउँदा २६० र बाहिर जाँदा २०० रुपैयाँ तिर्नुपर्ने भएको छ ।
भारी उपकरणतर्फ काठमाडौं आउँदा ६०० रुपैयाँ र बाहिर जाँदा २५० रुपैयाँ तिर्नुपर्नेछ ।
दुईपांग्रे सवारीसाधनले भने सुरुङमार्गमा प्रवेश पाउने छैनन् ।
सुरुङमार्ग केही महिना पछि सञ्चालनमा ल्याउने सरकारी तयारी छ तर मिति तोकिएको छैन।
