काठमाडौँ, साउन २० । भारतीय म्युजिक कम्पनी टी-सिरिजले युट्युबमा ३० करोड सब्सक्राइबरको आँकडा पार गरेको छ । सोमबार कम्पनीले यो महत्त्वपूर्ण कोशेढुङ्गा पार गरेको हो ।
युट्युबमा महत्त्वपूर्ण कोशेढुङ्गा पार गरेसँगै टी-सिरिजले आभार व्यक्त गरेको छ । कम्पनीले सामाजिक सञ्जाल एक्समा लेखेको छ, “भारतका गल्लीदेखि विश्वका पर्दासम्म – हामी संगीतको विश्वव्यापी भाषा बनेका छौँ । सुनिदिनुभएको, माया गर्नुभएको, विश्वास गर्नुभएको र यो यात्राको हिस्सा बनिदिनुभएकोमा धन्यवाद ।”
टी-सिरिज १० करोड र २० करोड सब्सक्राइबर पार गर्ने विश्वकै पहिलो युट्युब च्यानल हो । तर, ३० करोड सब्सक्राइबरको आँकडामा भने अमेरिकी नागरिक जिम्मी डोनाल्डसन (मिस्टर बिस्ट) ले सञ्चालन गरेको युट्युब च्यानल अगाडि रह्यो । अहिले टी-सिरिज ३० करोड सब्सक्राइबरको उत्सव मनाइरहँदा मिस्टर बिस्टको सब्सक्राइबरको सङ्ख्या भने ४२ करोड पुग्न लागेको छ ।
टी-सिरिज भारतबाट सुरु भए पनि यसका दर्शक-श्रोता विश्वभर छन् । राम्रो चर्चा पाएका नेपाली गीतलाई पनि टी-सिरिजले हिन्दीमा रूपान्तरण गर्दै आएको छ ।
Published Date: 05 August 2025
