काठमाडौं, जेठ २६ । सौन्दर्यको लागि महिलाहरूले अपनाउने आम प्रक्रियामध्ये एक हो आइब्रो थ्रेडिङ । यद्यपि, यो प्रकृया स्वास्थ्यका लागि जोखिमपूर्ण बन्न सक्ने एउटा अध्ययनले देखाएको छ ।
यदि तपाईं पनि हरेक १५–२० दिनमा पार्लर पुगेर आइब्रो थ्रेडिङ गराउँदै आउनु भएको छ भने अब एकपटक यसबाट हुने हानी नोक्सानी बारे जान्नु पर्छ ।
अनावश्यक रौँ हटाउने उपायका रूपमा रेजर वा वाक्सिङ जस्तै अनुहारको सौन्दर्य निखार्न महिलाहरूले आइब्रो थ्रेडिङलाई प्राथमिकता दिने गरेका छन् । यद्यपि, यो प्रक्रिया सजिलो र छिटो भए पनि यसका गम्भीर नतिजा देखिन सक्छन् ।
आइब्रो थ्रेडिङले पार्न सक्ने असरहरू
छालामा जलन
संवेदनशील छालामा बारम्बार थ्रेडिङ गर्दा जलन हुने सम्भावना उच्च हुन्छ । यस्तो अवस्थामा छाला रातो देखिन सक्छ वा चिलाउने अनुभव हुन सक्छ ।
पिम्पल्स तथा फोका
थ्रेडिङपछि खुला रहने छालाका पोर्सबाट धूलो वा ब्याक्टेरिया छालामा प्रवेश गर्न सक्छन्, जसले गर्दा पिम्पल्स र साना घाउ अथवा फोकाहरु आउन सक्छन् ।
चाँडो बुढ्यौलीको संकेत
कम उमेरमै थ्रेडिङ गर्न थाल्ने युवतीहरूमा चाउरी देखा पर्न थालेको विशेषज्ञहरू बताउँछन् । पटक–पटक तानेको छालामा लचिलोपन हराउँदै जान्छ, जसले बुढ्यौलीको संकेत चाँडै देखिन सक्छ ।
सन बर्नको खतरा
थ्रेडिङपछि खुला पोर्स भएका छालामा घाम परेमा सनबर्नको खतरा बढ्छ । त्यसैले थ्रेडिङपछि अनिवार्य रूपमा सनस्क्रिन लगाउन सल्लाह दिइन्छ ।
त्यसैले सधैं अनुभवी र प्रोफेसनल व्यक्ति बाट मात्र थ्रेडिङ गराउनुहोस्। प्रयोग गरिने धागो सफा र उच्च गुणस्तरीय छ कि छैन त्यो पनि ध्यान दिन आवश्यक छ ।
थ्रेडिङपछि के गर्ने ?
थ्रेडिङपछि छाला चिलाउने अथवा रातो हुने समस्या भएमा एलोभेरा जेल प्रयोग गर्नु पर्छ । यसले छालामा शीतलता ल्याउने र एलर्जी वा संक्रमणबाट जोगाउने काम गर्छ।
