दोलखा, वैशाख ७ । कालिन्चोक भगवती मन्दिर नेपालको दोलखा जिल्लामा अवस्थित प्रसिद्ध धार्मिक स्थल हो । सदरमुकाम चरिकोटबाट करिब १७ किलोमिटर दूरीमा रहेको कुरीबजारसम्म मोटरबाट र त्यहाँबाट करिब १ घण्टाको उकालो पैदलयात्रा गरेर यो मन्दिरमा पुग्न सकिन्छ । कुरीबजारबाट केबुलकारमा मन्दिरसम्म जाने सुविधा पनि छ ।
कालिञ्चोक भगवती काभ्रेको पलाञ्चोक भगवती, काठमाडौंको शोभा भगवती र अन्य भगवतीसमेत ७ भगवती दिदी बहिनी हुन् भन्ने किम्बदन्ती पनि रहेको छ । कालिञ्चोक डाँडाबाट मनोरम रोलवालिङ हिम शृंखला र मनोरम प्राकृतिक दृष्यको अवलोकन गर्न सकिन्छ ।
यो मन्दिर समुद्री सतहदेखि करिब ३ हजार ८ सय ४२ मिटरको उचाइमा रहेको छ । कालिन्चोक मन्दिर हिन्दू धर्मका भक्तजनका लागि महत्वपूर्ण शक्ति पीठ मानिन्छ । विभिन्न चाडपर्व तथा विशेष अवसरमा यहाँ भक्तजनको घुइँचो लाग्ने गर्दछ । यस क्षेत्रमा हिउँ परिरहने भएकाले हिउँमा खेल्न युवायुवती पनि प्रसस्त जाने गर्छन् ।
यस मन्दिरमा भक्तजनले पशु वलि, नरिवल वलि र अन्य पूजा सामग्रीका साथै त्रिशुल, घण्टी चढाउने परम्परा रहेको छ ।
