काठमाडौं, माघ १५ । साओमीले नेपाली बजारमा रेड्मी १३ स्मार्टफोनको मूल्य एक हजार रुपैयाँले घटाएको छ । कम्पनीले ६ जीबी + १२८ जीबी र ८ जीबी + २५६ जीबी भेरियन्टमा उपलब्ध यो मोडेलको नयाँ मूल्य घोषणा गरेको हो ।
नेपालका लागि साओमीका कन्ट्री जनरल म्यानेजर मनु मानस्वीले रेड्मी १३ को मूल्य घटेको जानकारी दिँदै भने, “हामी रेड्मी १३ मा विशेष छुटको घोषणा गर्न पाउँदा उत्साहित छौं । यो फोन पर्फर्मेन्स, नयाँपन र स्टाइलको उत्कृष्ट मिश्रण हो । यो छुट हाम्रो उच्च गुणस्तरको प्रविधि सबैलाई उचित मूल्यमा उपलब्ध गराउने प्रतिबद्धताको एउटा हिस्सा हो । यस मूल्यले ग्राहकलाई अझ बढी सन्तुष्टि दिनेछ र रेड्मी १३ यो श्रेणीमा सबैभन्दा उत्कृष्ट स्मार्टफोनको रूपमा स्थापित हुनेछ ।”
रेड्मी १३ मा मिडियाटेक हेलियो जी ९१-अल्ट्रा प्रोसेसर रहेको छ, जसले गेमिङ, मल्टी-टास्किङ र दैनिक काममा उत्कृष्ट प्रदर्शन दिने कम्पनीको दाबी छ । यसमा ९० हर्ज रिफ्रेसरेट सहितको ६.७९ इन्चको एफएचडी प्लस डट डिस्प्ले छ । १०८ मेगापिक्सेलको मुख्य क्यामेरा, २ मेगापिक्सेलको म्याक्रो लेन्स र १३ मेगापिक्सेलको फ्रन्ट क्यामेरा रहेको यो स्मार्टफोन ५०३० एमएएच क्षमताको ब्याट्री र ३३ वाटको फास्ट चार्जिङ सुविधा सहित उपलब्ध छ ।
रेड्मी १३ को नयाँ मूल्यमा ६ जीबी + १२८ जीबी भेरियन्टको मूल्य १७,९९९ रुपैयाँ र ८ जीबी + २५६ जीबी भेरियन्टको मूल्य २०,९९९ रुपैयाँ तोकिएको छ । रेड्मी १३ मिडनाइट ब्ल्याक, पर्ल पिंक र ओसियन ब्लू गरी तीन कलर भेरियन्टमा नेपालका सबै मी स्टोर र साओमीका आधिकारिक रिटेल आउटलेटमा उपलब्ध छ ।
