काठमाडौं, पुस २२ । भारतीय चिकित्सा अनुसन्धान परिषद् (आइसीएमआर)ले सोमबार कर्नाटकमा २ वटा ह्युमन मेटाप्निमोभाइरस (एचएमपीभी)का केसहरु पत्ता लागेको पुष्टि गरेको छ । यी केसहरु आइसीएमआरद्वारा विभिन्न श्वासप्रश्वास भाइरसहरुको नियमित निगरानी मार्फत पत्ता लागेको हिन्दुस्तान टाइम्सले जनाएको छ ।
बेंगलुरुको बाप्तिस्ट अस्पतालमा भर्ना भएकी ३ महिनाकी बालिकालाई एचएमपीभी भएको पुष्टि भएको हो । उनलाई अस्पतालबाट डिस्चार्ज गरिएको मन्त्रालयले जानकारी दिएको छ । त्यसैगरी, ८ महिनाको बालक जसलाई ब्रोंकोप्नेमोनिया भएको इतिहास थियो, उनलाई पनि एचएमपीभी पोजिटिभ भएको पुष्टि भएको छ । भारतको युनियन स्वास्थ्य मन्त्रालयले ती दुवै बिरामीहरुको अन्तर्राष्ट्रिय यात्राको कुनै इतिहास नभएको जनाएको छ ।
केही दिनअघि चीनले ह्युमन मेटाप्निमोभाइरस (एचएमपीभी) को प्रकोप सामना गरिरहेको समाचार सार्वजनिक भएसँगै भारतमा पनि यसको संक्रमण पुष्टि भएको छ ।
