काठमाडौं, मंसिर १८ । चीनमा विकास भइरहेको नयाँ पुस्ताको तीव्र गतिको ट्रेनले यात्रुहरूलाई १,००० किमि प्रति घण्टाको गतिमा यात्रा गर्दा अल्ट्रा-हाई-डेफिनेसन भिडिओ हेर्न र अनलाइन गेमिङको आनन्द लिन सक्ने सुविधा प्रदान गर्न सक्ने भएको छ ।
अझै विकासकै क्रममा रहेको यो ट्रेनले चुम्बकीय उत्तोलन प्रयोग गरेर नियर-भ्याकुम ट्युब मार्फत व्यावसायिक विमानको तुलनामा छिटो गतिको यात्रा गर्नेछ ।
३५० किमि प्रति घण्टाको स्पिडमा चल्ने हालका तीव्र गतिका चिनियाँ रेलहरू भित्र टेलिकम अपरेटरहरूले प्रदान गर्ने फाइजी सेवामा चलिरहेको हुन्छ । लामो सुरुङभित्र पनि उक्त सेवा निरन्तर प्राप्त गर्न सकिने भएकाले यात्रुहरूले सहज रूपमा इन्टरनेटको प्रयोग गर्न सक्छन् ।
तर, लगभग ध्वनिकै जत्तिको गतिमा यात्रा गर्दा मोबाइल फोन र बेस स्टेसनबिच उच्च गतिको सञ्चार कायम राख्नु भने निकै ठुलो चुनौतीको कुरा हो । किन भने मोबाइल फोन तीव्र गतिमा बेस स्टेसनतर्फ नजिकिँदा वा टाढिँदा त्यसले प्राप्त गर्ने सिग्नलको फ्रिक्वेन्सी परिवर्तन हुन्छ । उच्च गतिको डेटा सञ्चारका लागि स्थिर तथा उच्च फ्रिक्वेन्सीको सिग्नल आवश्यक पर्छ, जुन यस्तो अवस्थामा चुनौतीपूर्ण हुन्छ ।
नियर-भ्याकुम ट्युबभित्र बेस स्टेसन जडान र मर्मत सम्भार गर्न पनि कठिनाइ हुन्छ । यदि कम्पनका कारण एन्टेना खसेमा तीव्र गतिमा यात्रा गरिरहेको ट्रेनलाई गम्भीर खतरा पुग्न सक्छ ।
तर, साउथइस्ट युनिभर्सिटीमा रहेको नेसनल की ल्याबरेटोरी अफ मोबाइल कम्युनिकेसन्सका प्राध्यापक सोङ टाइचङको नेतृत्वमा रहेको अनुसन्धान टोलीले यस समस्याको समाधान निकालेको छ । जसअनुसार ट्युबको भित्री पर्खालमा दुई ओटा समानान्तर केबुल बिछ्याउँदा सो समस्याको हल हुनेछ ।
