काठमाडौं, कार्तिक २३ । हिजो तोलामा ४ हजार रुपैयाँले घटेको सुनको भाउ आज भने तोलामा २ हजार रुपैयाँले बढेको छ । नेपाल सुन–चाँदी व्यवसायी महासंघका अनुसार शुक्रबार छापावाल सुन प्रतितोला २ हजार रुपैयाँले बढेर १ लाख ६६ हजार ५०० रुपैयाँ कायम भएको छ । यसअघि, बिहीबार छापावाल सुनको भाउ १ लाख ६४ हजार ५०० रुपैयाँ कायम रहेको थियो ।
बुधबार संयुक्त राज्य अमेरिकामा ४७औँ राष्ट्रपतिमा डोनाल्ड ट्रम्प निर्वाचित भएलगत्तै विश्व बजारमा सुनको भाउ घटेको थियो । अन्तर्राष्ट्रिय बजारमा सुनको मूल्यमा उतारचढाव आएसँगै नेपाली बजारमा पनि त्यसको प्रभाव पर्ने गरेको छ ।
यता, शुक्रबार चाँदीको भाउ पनि तोलामा २० रुपैयाँले बढेर १९ सय ८० रुपैयाँ कायम भएको छ । बिहीबार चाँदीको भाउ प्रतितोला १९ सय ६० रुपैयाँ कायम रहेको थियो । अन्तर्राष्ट्रिय बजारमा आज सुन प्रतिऔंस २ हजार ६६०.११ डलर र चाँदी प्रतिऔंस ३१.१४ डलरमा कारोबार भइरहेको छ ।
