मुम्बई, कार्तिक २३ । भारतीय टेलिभिजन रियालिटी शो ‘दादागिरी–२’ जितेर लोकप्रिय भएका टेलिभिजन अभिनेता नितिन चौहानको बिहीबार मुम्बईमा निधन भएको छ । उनी केवल ३५ वर्षका थिए ।
उत्तर प्रदेशको अलीगढ जिल्लाका स्थायी वासिन्दा नितिनले एमटिभीको ‘स्प्लिट्स भिल्ला सीजन ५’ पनि जितेका थिए । यी दुई रियालिटी शोबाहेक उनले जिन्दगी डटकम, क्राइम पेट्रोल तथा फ्रेण्ड्स जस्ता धारावाहिकहरुमा समेत अभिनय गरेका थिए । उनी क्राइम पेट्रोलका पनि निकै लोकप्रिय भएका थिए ।
नितिनले अन्तिम पटक सन् २०२२ मा सब टिभीका लागि ‘तेरा यार हूँ मैं’ मा काम गरेका थिए । यो शोका उनका सह–कलाकार सुदीप साहित तथा सायन्तनी घोषले उनको निधनको खबरलाई पुष्टि गरेका छन् । यद्यपि, उनीहरुसंग थप जानकारी छैन । उनका एक पूर्व सह–कलाकार विभूति ठाकुरको सामाजिक सञ्जाल पोस्ट अनुसार नितिनले आत्महत्या गरेका हुन् ।
सूत्रका अनुसार उनका बुवा उनको निधनको खबरपछि मुम्बई पुगेका छन् र उनको पार्थिव शरीरलाई अलीगढ ल्याइने छ । अहिले उनको निधनका बारेमा प्रहरीको तर्फबाट कुनै पनि भनाइ सार्वजनिक भएको छैन । प्रहरीले घटनाको अनुसन्धान गरिरहेको बताइएको छ ।
Published Date: 08 November 2024
