भक्तपुर, कार्तिक १६ । भक्तपुर जिल्ला सूर्यविनायक नगरपालिका कटुन्जेस्थित युनिटी सेकेण्डरी स्कूलमा तिहार साँस्कृतिक तथा सम्मान कार्यक्रम २०८१ सम्पन्न भएको छ ।
सो अवसरमा विद्यालयले विद्यार्थी, शिक्षक र ज्येष्ठ नागरिकलाई सम्मान गरेकाे हो। कार्यक्रममा प्रमुख आतिथ्यता बागमती प्रदेशका स्वास्थ्य मन्त्री किरण थापाले गरेका थिए । कार्यक्रममा सूर्यविनायक नगरपालिका वडा नं ५ का वडा अध्यक्ष राजकुमार जाेशी, नेशनल प्याब्सन भक्तपुरका अध्यक्ष सन्जय खड्का, सूर्यविनायक नगरपालिकाका शिक्षा शाखा प्रमुख रत्न बहादुर कटवाल लगायतका व्यक्तित्वहरुको उपस्थिति रहेको थियो ।
कार्यक्रममा विद्यालयबाट एसईई २०८० मा ४ जिपिए प्राप्त गर्न सफल विद्यार्थी आशिष थापालाई नगद रू. २० हजारसहित सम्मान गरिएको थियाे ।
विद्यालयका प्रिन्सिपल विपिन गुमान्जुले साे कार्यक्रममा ज्येष्ठ नागरिक, १० वर्षसम्म निरन्तर सेवारत शिक्षक तथा हाल कार्यरत शिक्षक, एसईई उत्तीर्ण विद्यार्थी सम्मान गरेका थिए ।
विद्यालय व्यवस्थापन समितिका अध्यक्ष रणबहादुर गुमान्जुकाे सभापतित्वमा सम्पन्न साे कार्यक्रममा विद्यालयका शिक्षक, विद्यार्थीले सांस्कृतिक प्रस्तुति प्रस्तुत गरेको कुरा प्रिन्सिपल विपिन गुमान्जुले आइकन खबरलाई जानकारी दिए ।
