काठमाडौं, कार्तिक २ । विश्वको सबैभन्दा लोकप्रिय मोबाइल फोन अर्थात एप्पलको आईफोनको नयाँ मोडल सार्वजनिक भएको केही सातामात्र भएको छ । नेपालमा बजारमा समेत भरखरै उपलब्ध हुन थालेको आईफोन १६ ले अहिले विश्व बजारमा चर्चा पाइरहेको छ ।
यद्यपि, आईफोन १६ विश्वका सबै देशहरुमा पुग्न बाँकी नै रहेको बेला फोनका पारखीहरुमाझ आईफोन १७ तथा आईफोन १८ का बारेमा चर्चा हुन थालिसकेको छ । नयाँ आइफोन सार्वजनिक भएलगत्तै अघिल्लो जेनेरेशनको चर्चा प्रारम्भ हुनुलाई खासै अस्वभाविक रुपमा समेत लिईँदैन ।
यसैबीच, यतिबेला आईफोन १८ का केही जानकारीहरु लीक भएको अन्तर्राष्ट्रिय समाचार संस्थाहरुले दावी गरेका छन् । ती समाचारहरुमा उल्लेख भए अनुसार आईफोन १८ मा टु एनएम प्रोसेसर समावेश गरिने सम्भावना छ । भनिन्छ, एप्पल आईफोन १८ सन् २०२६ मा सार्वजनिक हुनेछ । यसका लागि अझै केही वर्ष प्रतिक्षा गर्नु पर्नेछ । यद्यपि, यो फोनसंग सम्बन्धि जानकारीहरु भने सार्वजनिक हुन थालिसकेका छन् ।
रिपोर्टका अनुसार यो नयाँ आइफोनमा विश्वकै पहिलो टु एनएम प्रोसेसर समावेश गरिने छ । उक्त प्रोसेसरलाई टिएसएमसी (ताइवान सेमीकन्टक्टर मेनूफ्याक्चरिङ कम्पनी) ले बनाउने सम्भावना छ । एप्पल आईफोन १८ सीरीजमा ए२० प्रोसेसर समावेश हुने सम्भावना छ, जुन नेक्स्ट लेभलको फेब्रिकेशनमा आधारित हुनेछ । यसले अत्यधिक गति तथा उत्कृष्ट परफर्मेन्स दिनेछ । उक्त प्रोसेसरले कम इनर्जी खपत गर्नेछ, जसबाट आगामी आईफोनमा उत्कृष्ट ब्याट्री लाइफ पनि पाइने छ । यसबाहेक कम्पनीले फोनमा केही नयाँ अपडेटसमेत उपलब्ध गराउने छ ।
आईफोन १८ मा एप्पलको ट्रेडिशनल इन्फो (इन्टिग्रेटेड फ्यान–आउट) प्याकेजिङको स्थानमा डब्ल्यूएमसिएम (वेफर–लेभल–मल्टि–चिप मोड्यूल) प्याकेजिङ दिन सक्ने छ । नयाँ प्रविधिको प्रयोगबाट मल्टीपल कम्पोनेन्टहरुले उत्कृष्ट इन्टिग्रेशन पाउने छन् । यसबाट फोनमा उत्कृष्ट परफर्मेन्स तथा तिब्र कम्युनिकेशन पाउन सकिने छ ।
टु एनएम चिपसंगै कम्पनीले आईफोन १८ मा १२ जिबिको र्यामसमेत दिन सक्ने छ, जुन अहिले उपलब्ध आइफोन १६ को तुलनामा डेढ गुणा बढी हुनेछ । आईफोन १८ को डिजाइनका बारेमा अहिले कुनै पनि जानकारी सार्वजनिक भएको छैन । कम्पनीले हालैमात्र आईफोन १६ सार्वजनिक गरेको छ । यद्यपि, अहिलेदेखि नै आईफोन १७ तथा आईफोन १८ का बारेमा जिज्ञासा तथा कौतुहलता पैदा हुन थालिसकेको छ ।
Published Date: 18 October 2024
