काठमाडौं, असोज ११ । सुनको भाउले लगातार ६ दिन नयाँ रेकर्ड कायम गरेको छ । यो सँगै पछिल्लो ६ दिनमा मात्र सुनको भाउ तोलामा ४१ सय रुपैयाँ बढेको छ । नेपाल सुन–चाँदी व्यवसायी महासंघका अनुसार शुक्रबार (असोज ११ गते) छापावाल सुन प्रतितोला ५०० रुपैयाँले बढेर १ लाख ६१ हजार २०० रुपैयाँ कायम भएको छ ।
यसअघि बिहीबार छापावाल सुन प्रतितोला १ लाख ६० हजार ७०० रुपैयाँमा कारोबार भएको थियो । पछिल्लो समय इजरायल–लेबनान द्वन्द्वको प्रभाव तथा युक्रेनमाथि रुसको हमलाका कारण लगानीकर्ताहरुले सुरक्षित लगानीको रुपमा सुनतर्फ आकर्षित भएका छन् ।
पछिल्लो केही दिनयता इजरायल–लेबनानको द्वन्द्व तथा युक्रेनमाथि रुसको आक्रमण बढ्दो क्रममा रहेकोले सुनको मूल्यमा अझै वृद्धि हुने विश्लेषकहरुको भनाई छ । अन्तर्राष्ट्रिय बजारमा सुनको मूल्य बढेसँगै नेपाली बजारमा पनि त्यसको असर पर्ने गरेको छ ।
आज चाँदीको भाउ भने स्थिर रहेको छ । शुक्रबार चाँदीको भाउ प्रतितोला १९ सय ५५ रुपैयाँ कायम रहेको छ । यसअघि बिहीबार पनि चाँदी सोही मूल्यमा किनेबच भएको थियो ।
