काठमाडौं, असोज १९ । दुई वर्षअघि दशैँमा नेपाली तथा हिन्दी भाषामा नेपाल र भारतमा एकसाथ सार्वजनिक प्रदर्शन भएको नेपाली फिल्म ‘प्रेम गीत ३’ ओटीटी प्लेटफर्म ‘सिनेमाघर एप’ मा रिलिज भएको छ ।
सिनेमाघरमा हालै रिलिज भएको यो फिल्ममा प्रदीप खड्का, क्रिस्टिना गुरुङ, शिव श्रेष्ठ, मनिष राउत, अनुभव रेग्मी, सम्वृद्धि शाही ठकुरी, सुनिल थापा, सन्तोष सेन, माओत्से गुरुङ, पुस्कर कार्की, प्रेम पुरी, लक्ष्मी वर्देवा, योगिशा खत्रीलगायतका कलाकारको अभिनय छ । यो फिल्मलाई छेतेन गुरुङ र सन्तोष सेनले संयुक्त निर्देशन गरेका छन् ।
यस फिल्ममा खजाग राज्यका कान्छा राजकुमार प्रेम र उनकी प्रेमिका गीतको कथा छ । प्रेम शुभ ज्योतिषीय समयमा जन्मिएका थिए र भविष्यमा राजा हुने भविष्यवाणी गरिएको थियो । तर, यी सबैको बीचमा उनी आफ्नो जीवनको सबैभन्दा ठूलो चुनौतीसँग जुध्न बाध्य हुन्छन्, जुन थियो उनको प्रेम ।
‘प्रेम गीत ३’ रिलिजसँगै सिनेमाघर एपले एउटा ठूलो अपडेट ल्याएको छ, जसअनुसार यसअघि एन्ड्रोइड र आइओएस मोबाइल तथा स्मार्ट टिभी प्लेटफर्महरूमा रहेकोमा अब फिल्मत्रहरू ल्यापटप र डेस्कटपमा वेब ब्राउजरमार्फत पनि हेर्न सकिने भएको छ । यसका साथै फोनपे क्युआर कोडमार्फत नेपाल र भारतबाट सजिलै भुक्तानी गर्न मिल्ने सुविधा पनि उपलब्ध हुनेछ । सिनेमाघरका सिइओ सागर खरेलका अनुसार नेपाली भाषा विकल्प र २४ घण्टा प्राविधिक सहयोगको सुविधा पनि छिट्टै उपलब्ध गराइने छ ।
