कपिलवस्तु, माघ १८ । कपिलवस्तुको तौलिहवाबाट २१ लाख अवैध भारतीय रुपैयाँसहित तीन जना पक्राउ परेका छन् । विशेष सुचनाको आधारमा गएराति करिब नौ बजे तौलिहवाको जमुहर पुल नजिकै भारतीय नम्बर प्लेट भएको कारमा पैसासहित उनीहरुलाई पक्राउ गरिएको हो । पक्राउ पर्नेमा दुई नेपाली र एक भारतीय नागरिक रहेका छन् ।
प्रहरी उपरीक्षक प्रेमबहादुर बस्नेतका अनुसार पक्राउ पर्नेमा शुद्धोदन गाउँपालिका–६ विमिहाका २६ वर्षीय राकेशकुमार वर्मा, गाडीका चालक नौगढ निवासी २८ वर्षीय हमिद मुसलमान रहेका छन् । , भारतको सिद्धार्थनगर, हाल मायादेवी गाउँपालिका–१ इमिलिया, कपिलवस्तुमा बस्छिन् ।
तौलिहवाबाट भैरहवा आउँदै गर्दा (युपी ५५ एएम ०४५९) हुण्डाई भेन्यु गाडीका चालक र अगाडिका दुई सिटबाट कुल २१ लाख ७१ हजार भारतीय रुपैयाँ बरामद गरिएको हो । सिट मुनि तीन ठाउँमा नक्कली बटम बनाएर लुकाएर रकम बरामद भएको हो ।
भारतमा सुन बेचेर उनीहरु तौलिहवातर्फ आउँदै गरेको स्रोतले जनाएको छ । धेरै दिनदेखि यो व्यवसायमा संलग्न उनीहरुको बारेमा प्रहरीले जानकारी लिएको छ । पक्राउ परेका राकेश कुमार वर्मा तौलिहवास्थित मेरा मार्टका सञ्चालक पनि हुन् ।
पक्राउ परेकाहरुलाई आवश्यक कारवाहीको लागि राजस्व अनुसन्धान विभाग बुटवलमा बुझाउने तयारी भइरहेको प्रहरी उपरीक्षक बस्नेतले जानकारी दिए । उनीहरु विरुद्ध विदेशी मुद्रा हिनामिनाको मुद्दा चलाइने प्रहरीले जनाएको छ ।
