काठमाडौं, असार ९ । एआईले नबनाएका फोटोमा पनि ‘मेड विथ एआई’ को लेबल प्रयोग भएको भन्दै मेटाको आलोचना भएको छ ।
यसको एउटा उदाहरण कोलकता नाइट राइडर्स (केकेआर)ले इन्डियन प्रिमियर लिग (आईपीएल) जितेको फोटोमा पनि सो लेबल देखिनु हो । जुन अझै पनि केकेआरको इन्स्टाग्राम पोस्टमा देख्न सकिन्छ ।
विशेष गरेर साधारण एडिट गर्दा पनि फोटोमा देखिने मेटाको गलत लेबलिङबारे फोटोग्राफरहरूले चिन्ता व्यक्त गरेका छन् । फोटोग्राफरहरूले एडोबीको जेनेरेटिभ एआई फिल जस्ता टुल प्रयोग गर्दा सो लेबल देखिने बताएका छन् । यद्यपि मेटाले फोटो एडिट गर्न एआई प्रयोग गरिएको अथवा एआईबाट बनाइएको भनेर छुट्टै लेबल दिँदैन । यसले गर्दा फोटोबारे भ्रम निम्त्याइरहेको उनीहरूको भनाइ छ ।
अर्कोतर्फ एआईबाट बनाइएका कतिपय फोटोमा सो लेबल गरिएको देखिँदैन । यसले गर्दा पनि धेरै फोटोग्राफरहरूले यो फिचरको आलोचना गरेका हुन् । यद्यपि यो एआई लेबल मोबाइल एपहरूमा मात्र देखिन्छ । तपाईंले वेब प्लेटफर्महरूमा देख्न सक्नुहुन्न ।
