काठमाडौं, जेठ ३२ । एप्पलले आफ्ना डिभाइसका लागि थुप्रै एआई फिचर ल्याउने बताएपछि त्यसबारे अन्तर्राष्ट्रिय जगतमा बहस बढेको छ । ओपनएआईसँग सहकार्य गरेर कम्पनीले सिरीमा च्याटजीपीटी इन्टिग्रेट गर्ने घोषणा गरिसकेको छ । यसपछि अर्बपति उद्यमी एलन मस्क विरोधमा उत्रिएका छन् ।
मस्कले आफ्ना कम्पनीहरूमा एप्पल डिभाइस प्रतिबन्ध गर्नेदेखि कम्पनीमा आउने भिजिटरको एप्पल डिभाइस समेत बाहिर राखिदिने चेतावनी दिएका छन् । त्यति मात्र नभइ ओपनएआईले एप्पल डिभाइसका प्रयोगकर्ताको डेटा कसरी प्रयोग गर्न सक्छ भन्ने विषयको सङ्केतका रूपमा मस्कले मिम पोस्ट गरिरहेका छन् ।
गोपनीयता र सुरक्षाका सन्दर्भमा सर्वोत्कृष्ट मानिने एप्पल डिभाइसले अप्रत्यक्ष रूपमा सबै डेटा ओपनएआईलाई उपलब्ध गराउने सङ्केत दिएपछि मस्कको पछिल्लो प्रतिक्रिया आएको हो ।
हुन त मस्क आफैं पनि एआई स्टार्टअप एक्सएआईका संस्थापक हुन् । त्यसैको अर्को प्रडक्ट हो, ग्रोक । यसलाई च्याटजीपीटीको प्रतिद्वन्द्वी मान्न सकिन्छ । यद्यपि अहिले यो एक्स (पहिलेको ट्वीटर)को प्रिमियम सब्स्क्रिप्सन लिने प्रयोगकर्ताले मात्र प्रयोग गर्न पाएका छन् । ग्रोकका फिचरबारे मस्क एक्समा चर्चा गरिरहेका हुन्छन् । तर, ग्रोक अझै पनि च्याटजीपीटीको स्तरमा आइसकेको छैन ।
एप्पलले ओपनएआईसँग सहकार्य गर्ने घोषणा गरेसँगै मस्कका समर्थकले उनलाई सामसङसँग सहकार्य गरेर एक्स फोन निर्माण गर्न अनुरोध गर्न थालेका छन् ।
एक एक्स प्रयोगकर्ताले पोस्टमार्फत “एक्सले सामसङसँग मिलेर एक्स फोन बनाउने भएको छ” लेखेका थिए । त्यसको रिप्लाईमा मस्कले लेखेका छन्, “कलिङ इट नाउ ।” अर्थात् उनले निकट भविष्यमा एक्स फोन बन्ने सम्भावना रहेको उल्लेख गरेका छन् ।
सन् २०१५ मा मस्कले साम अल्टम्यान र अन्य व्यक्तिसँग मिलेर ओपनएआई निर्माण गरेका थिए । सन् २०१८ मा उनी ओपनएआईको बोर्डबाट बाहिरिए । त्यसपछि आर्थिक रूपमा सहयोग गर्दै आएका उनी २०२२ मा च्याटजीपीटी आएपछि विरोधमा उत्रिएका छन् । त्यसमा पनि ओपनएआईलाई माइक्रोसफ्टले आर्थिक सहयोग गरिरहेको र कम्पनीलाई नाफामुखी बनाइरहेकाले मस्क ओपनएआईप्रति रुष्ट छन् ।
Published Date: 14 June 2024
