मुम्बई, जेठ ३२ । सुशान्त सिंह राजपूतको निधन भएको आज चार वर्ष पुरा भएको छ । चार वर्षअघि १४ जूनका दिन यी प्रतिभाशाली अभिनेताले अन्तिम सास फेरेका थिए । यी अभिनेताको निधनको दुःख आज पनि उनका प्रशंसकहरुलाई उत्तिकै छ । प्रशंसकहरुले अझै पनि उनलाई बिर्सन सकेका छैनन् । आफ्नो क्षमता तथा प्रतिभाका लागि उनी सधैं सम्झनामा रहिरहने छन् ।
१२ वर्षसम्म टेलिभिजन तथा ७ वर्षसम्म बलिउडको करियरमा सुशान्त सिंह राजपूतले आफ्नो प्रतिभा तथा मेहनतको बलमा फिल्म क्षेत्रमा एउटा बेग्लै पहिचान बनाएका थिए । पटनामा जन्मिएका सुशान्तबाट इन्जिनियर बन्न निस्किएका थिए, तर भाग्यले उनलाई अभिनेता बनाइदिएको थियो ।
१४ जुन २०२४ अर्थात आज सुशान्त सिंह राजपूतको वार्षिक पूण्य तिथि हो । यीनै दिवंगत अभिनेताका बारेमा केही रोचक प्रसंगः
२१ जनवरी १९८६ मा पटनामा जन्मिएका सुशान्त सिंह राजपूतले होमटाउनमै प्रारम्भि अध्ययन पुरा गरेपछि दिल्ली गएका थिए । दिल्ली उनी इन्जिनियर बन्न गएका थिए, तर थिएटरमा आवद्ध भएपछि उनीभित्र अभिनयको भोग जाग्न थाल्यो । उनी इन्जिनियरिङको प्रवेश परीक्षामा उत्तिर्ण पनि भएका थिए । यतिमात्र होइन, उनी अल इन्डिया इन्जिनियरिङ इन्ट्रान्स एग्जाममा सातौं स्थानमा परेका थिए ।
सुशान्तले दिल्ली स्कूल अफ इन्जिनियरिङमा अध्ययन गरेका थिए । तीन वर्षसम्म इन्जिनियरिङको अध्ययन गरेपछि उनले पढाइ छाडिदिए । उनी पढाइमा त अब्बल थिए नै, तर अभिनयको उनको हुटहुटीले उनले पढाइलाई बीचमै छाड्ने निर्णय गरेका थिए ।
सुशान्त सिंह राजपूत अभिनयसंग संगै नृत्यमा पनि पारंगत थिए । उनले श्यामक डावरको ग्रुप तथा एश्ले लोबोसंग नृत्य सिकोका थिए भने नादिरा बब्बरको थिएटर ग्रुप तथा बेरी जानको अभिनय स्कूलबाट अभिनयको प्रशिक्षण लिएका थिए । धेरैलाई जानकारी नभएको एउटा कुरा, यी अभिनेताले ऐश्वर्या राय तथा अभिषेक बच्नन स्टारर फिल्म ‘धूम २’ मा ब्याकग्राउण्ड डान्सरको रुपमा काम गरेका थिए ।
शाखरुख खान पहिलो त्यस्ता अभिनेता हुन् जसको चन्द्रमामा घर छ, सुशान्त सिंह राजपूतले भने चन्द्रमामा पनि जग्गा किनेका थिए । सन् २०१८ मा सुशान्तले इन्टरनेशनल लूनर ल्याण्ड्स रजिस्ट्रेसनबाट जग्गा खरिद गरेका थिए । उनको प्लट सी अफ मसकोवीमा छ । दुबै हातले लेख्न सक्ने क्ष्ँमता भएका सुशान्तसंग हाई एड्भान्स टेलीस्कोपसमेत थियो । उनले नासा गएर एस्ट्रोनेट बन्न तयारीसमेत गरेका थिए, यद्यपि उनले यो कार्य भने गर्न सकेनन् ।
सुशान्त सिंह राजपूतलाई सुपरबाइक तथा कारहरुको पनि सौख थियो । उनको कलेक्सनमा बिएमडब्ल्यू केथर्टिनहन्ड्रेडआर, एउटा मासेराटी क्वाट्रोपोर्टे तथा एउटा रेञ्ज रोबर थियो । यसका साथै उनको एउटा अंक अर्थात ४७४७ संग विशेष सम्बन्ध थियो । उनका दुबै गाडिको नम्बर प्लेटको अन्तिम नम्बर ४७४७ नै थियो । अभिनेताले विभिन्न अवसरहरुमा समेत यो नम्बर उच्चारण गरेका थिए । भनिन्छ, उनलाई कुनै ज्योतिषीले यो नम्बर प्रयोग गर्न सुझाएका थिए ।
सुशान्त सिंह राजपूतले सन् २००८ मा टिभी सीरीयल ‘किस देश मैं है मेरा’ बाट अभिनय करियरको थालनी गरेका थिए । यो सीरीयलमा उनको सेकेण्ड लीड रोल थियो, यद्यपि आफ्नो अभिनय क्षमताले उनले दशर््कको मन जितिसकेका थिए । त्यसपछि उनीमाथि एकता कपूरको नजर पर्यो, सुशान्तले ‘पवित्र रिश्ता’ मा काम गर्ने अवसर पाए । यही सीरीयलबाट उनी रातारात सेलिब्रेटी बने ।
सुशान्तलाई सधैं बलिउडमा काम गर्ने चाहना थियो । त्यसैले टेलिभिजनमा चम्किएपछि उनले फिल्मी संसारतर्फ पाइला अघि बढाए र पहिलो फिल्म ‘काई पो छे’ मा अभिनय गरे । उनले बलिउडमा ‘एमएस धोनीः द अनटोल्ड स्टोरी’ बाट पहिचान बनाए । त्यसपछि उनले ‘केदारनाथ’ तथा ‘छिछोरे’ फिल्ममा अभिनय गरेर दर्शकको मन जिते ।
१४ जून २०२० का दिन उनले यो संसार छाडेर गए । यी प्रतिभाशाली अभिनेताप्रति हार्दिक श्रद्धासुमन ।
