विश्वव्यापी रूपमा खाद्यान्नको मूल्य बढ्दै

काठमाडौं, जेठ २५ । खाद्यान्नको विश्वव्यापी मूल्य लगातार तेस्रो महिना पनि बढेको छ । संयुक्त राष्ट्रसंघअन्तर्गतको खाद्य एजेन्सीको ‘विश्व खाद्य मूल्य सूचकांक’ मे महिनामा पनि बढेर १२०.४ विन्दु कायम भएको रोयटर्सले उल्लेख गरेको छ ।

यसअघि मार्च महिनामा ११८.३ विन्दुमा रहेको उक्त सूचकांक अप्रिलमा पनि बढेर ११९.१ कायम भएको थियो । फेब्रुअरीमा लगातार सातौं महिना घटेर ३ वर्षयताकै न्यून अर्थात ११७ विन्दुमा आएको खाद्यान्नको विश्वव्यापी मूल्य मार्च महिनादेखि लगातार बढ्न थालेको हो ।

संयुक्त राष्ट्रसंघ अन्तर्गतको खाद्य तथा कृषि संगठनको सूचकांकले विश्वव्यापीरुपमा सबैभन्दा बढी कारोबार हुने खाद्य वस्तुहरुको मूल्य मापन गर्ने गर्दछ । खाद्यान्नको विश्वव्यापी मूल्य सन् २०२२ मार्च महिनाको ऐतिहासिक उचाइबाट तीव्र गतिमा घट्दै आएको थियो । यद्दपि, पछिल्लो केही महिनादेखि पुनः उकालो लाग्न थालेको हो ।

मे महिनामा चिनी र वनस्पति तेलको मूल्यमा गिरावट आएपनि अन्न र दुग्धजन्य पदार्थको मूल्यमा उच्च वृद्धि भएपछि सूचककांक माथि लागेको रोयटर्सले उल्लेख गरेको छ ।

मे महिनाको खाद्य सूचकांक गत वर्ष अर्थात सन् २०२३ को सोही अवधिको तुलनामा अझैपनि ३.४% तल रहेको छ । मे महिनामा अन्नको मूल्यमा सबैभन्दा उच्च ६.३% वृद्धि भएको छ ।

उत्तर अमेरिका, युरोप र ब्ल्याक सी लगायत प्रमुख उत्पादक क्षेत्रहरुमा सन् २०२४ मा बाली अवस्था प्रतिकूल रहने देखिएपछि अन्नको मूल्य बढेको हो । यस्तै, दुग्धजन्य पदार्थको मूल्य पनि अप्रिलको तुलनामा १.८% बढेको छ । यता, चिनीको मूल्यमा भने सबैभन्दा उच्च ७.५% गिरावट आएको छ ।