काठमाडौँ, जेठ २३ । काठमाडौंको चाबहिलमा एक पुरुषले आत्मदाहको प्रयास गरेका छन् । मंगलबार राति साढे ८ बजे उनले आफ्नै शरीरमा पेट्रोल छर्केर आगो लगाएका थिए ।
प्रहरीका अनुसार श्रीमतीसँग भएकाे झगडाले घटना घटेकाे हाे । घरायसी कुरामा भएको विवादले उग्र रुप लिएपछि ५२ वर्षका चञ्चल सिहंले पेट्रोल छर्केका थिए । यसकासाथै, उनले आफूलाई मात्र नभइ परिवारका ४ जनामाथि पनि पेट्राेल छर्के । त्यसपछि, उनले सबैकाे शरीरमा आगो लगाए ।
चञ्चलले श्रीमती विनु सिंह, छोरीहरू सुप्रिया, समृद्धि र सुहानीमाथि पेट्रोल छर्किएर आगो लगाएका हुन् । उनले ४४ वर्षकी विनु, २५ वर्षकी जेठी छाेरी सुप्रिया, १६ वर्षकी माइली छाेरी समृद्धि र ८ वर्षकी कान्छी छाेरी सुहानीलाई पनि आगो लगाएकाे प्रहरीकाे भनाइ छ । त्यसपछि उनीहरूलाई धुम्बाराहीस्थित हेल्पिङ ह्याण्ड अस्पाल पुर्याएको थियाे । तर अस्पतालले उनीहरूलाई राति नै कीर्तिपुरको बर्न अस्पतलमा रिफर गरिदिएकाे थियाे ।
अहिले पाँचै जनाको किर्तिपुर बर्न अस्पतालमा उपचार भइरहेको छ । घाइतेमध्ये जेठी र माइली छाेरीहरूको अवस्था गम्भीर रहेको छ भने अन्य तीन जनाकाे अवस्था सामान्य रहेकाे छ ।
यसअघि पनि चञ्चलले श्रीमती विनुमाथि घरेलु हिंसा गर्ने गरेकाे खुलेकाे छ । रक्सी सेवन गरेर श्रीमतीमाथि हातपात गर्ने र मार्ने धम्की दिएकाे भन्दै पहिले पनि उनीमाथि उजुरी परेकाे थियाे । केहि दिन अघि मात्रै विनुले महानगरीय प्रहरी वृत गौशालामा चञ्चलमाथि घरेलु हिंसाकाे आराेपमा उजुरी दिएकी थिइन् जसपश्चात प्रहरीले चञ्चललाई सम्झाएकाे थियाे ।
Published Date: 05 June 2024
