डालास, जेठ २३ । नेपाली राष्ट्रिय क्रिकेट टोली आईसीसी टी–२० विश्वकपको आफ्नो पहिलो खेलमा नेदरल्यान्डस्सँग पराजित भएको छ । मंगलवार राति सम्पन्न खेलमा नेपाललाई नेदरल्यान्ड्सले ६ विकेटले पराजित गरेको हो ।
नेपालले दिएको १०७ रनको सामान्य लक्ष्य नेदरल्याण्ड्सले ८ बल बाँकी छँदै चार विकेटको क्षतिमा भेट्टायो । नेपालविरुद्ध जीत निकाल्ने क्रममा म्याक्स ओ डाउडले अर्धशतक पूरा गरेका थिए ।
डाउड ५४ रन बनाए भने बास डे लिड ११ रनमा अविजित रहे । म्याक्स ओ डाउडले ४८ बलमा ४ चौका र १ छक्का प्रहार गरे ।
कप्तान स्कट इडवार्ड ५ रन बनाउँदा अविनास बोहोराको बलमा बोल्ड भएका थिए । नेदरल्याण्ड्सको इनिङमा तेस्रो विकेटका लागि ओपनर म्याक्स ओ डाउड र सेब्रट एंगेलब्रेचले २८ रनको साझेदारी गरे ।
सोमपाल कामीले १४ औँ ओभरको पहिलो बलमा सेब्रड एंगेलब्रेचलाई १४ रनमा रन आउट गराएका थिए । त्यसअघि दिपेन्द्र सिंह ऐरिले ८.२ ओभरमा ओपनर विक्रमजित सिंहलाई २२ रनमा बनाउँदा एलबीडब्लु धरापमा पारेका थिए । दोस्रो विकेटका रुपमा म्याक्स ओ डाउड र विक्रमजितले ४१ रनको साझेदारी गरेका थिए ।
त्यसअघि ओपनर माइकल लेविट दोस्रो ओभरको दोस्रो बलमा नै क्याच आउट भएका थिए । नेपालका तिव्र गतिका बलर सोमपाल कामीले माइकललाई १ रन बनाउँदा दिपेन्द्र सिंह ऐरिको हातबाट क्याच आउट गराएका थिए ।
त्यसअघि अमेरिकाको डलासस्थित ग्रान्ड प्रेरी स्टेडियममा नेदरल्यान्डस्ले टस जितेर फिल्डिङ रोजेपछि ब्याटिङ गरेको नेपाल १९.२ ओभरमा १०६ रन बनाउँदै अलआउट भयो ।
विश्वकपको पहिलो खेलमा नेदरल्यान्डस्विरुद्ध नेपालको ब्याटिङ चल्न सकेन । रनका लागि संघर्ष गरेको नेपालका ओपनिङ जोडीले इनिङलाई लामो समयअघि बढाउन नसक्दा नेपाल सस्तैमा समेटिएको हो ।
कप्तान रोहित पौडेलले बनाएको ३५ रन नै नेपालका लागि सर्वाधिक रह्यो । पौडेलले ३७ बलमा ५ चौका प्रहार गरे । नेपालले चौथो ओभरमा नै दुबै ओपनरलाई गुमाएको थियो । नेपालले दोस्रो ओभरको अन्तिम बलमा ओपनर आशिफ शेखलाई गुमाएको थियो । आशिफ ४ रन बनाउँदा टिम प्रिङग्लेको बलमा भिभियन किंग्माको हातबाट क्याच आउट भएका थिए ।
अर्का ओपनर कुशल भुर्तेल चौथो ओभरको पहिलो बलमा ७ रन बनाउँदा भान विकको बलका एलबीडब्लु धरापमा परे । कुशल मल्ल ९ रनमा क्याच आउट भए भने अनिल शाह ११ रन बनाउँदा टिम प्रिङग्लेको बलमा भान विकको हातबाट क्याच आउट भए । अनिलले १२ बलमा २ चौका प्रहार गरेका थिए ।
तेस्रो नम्बरमा ब्याटिङमा आएका अनिल शाह ११ रन बनाउँदा क्याच आउट भए भने कुशल मल्ल ९ रनमा क्याच आउट हुनुभयो । यो खेलमा दिपेन्द्र सिंह ऐरि १ तथा सोमपाल कामी शून्य रनमा नै आउट भएका थिए ।
तल्लो क्रममा ब्याटिङमा आएका गुल्सन झा र करण केसीले छक्का प्रहार गर्दै समर्थकमा केही आशा जगाएका थिए । १७ रन बनाएका करण केसी १९ औँ ओभरको पाँचौंं बलमा बास डे लिडको बलमा किंग्माको हातबाट क्याच आउट भए । करणले १२ बलमा २ छक्का सहयोगमा १७ रन बनाएका थिए ।
गुल्सन झा १४ रनमा बोल्ड आउट भए । अविनास बोहोरा शून्य रनमा कट एण्ड बोल्ड भए भने सागर ढकाल शून्य रनमा अविजित रहे ।
नेपाललाई सामान्य योगफलमा रोक्न नेदरल्यान्डस्का टिम प्रिंगलले तीन विकेट लिए । उनले आफ्नो स्पेलमा २० रन खर्चिए । लोगान भान विकले तीन विकेट लिए । पल भान मिकेरेन र बास डे लिडले समान दुई विकेट लिए ।
मंगलवारको खेलमा एकातिर नेपालको ब्याटिङ चल्न सकेन भने अर्कोतिर फिल्डिङमा खेलाडीहरुले केही सामान्य गल्ति गर्दा नेदरल्याण्ड्सलाई लक्ष्यमा पुग्नबाट रोक्न सकेनन् । लक्ष्यको बचाव गर्न मैदानमा उत्रिएको नेपालका खेलाडीहरुले केही सहज क्याचहरु छाडेका थिए ।
