इलाम, वैशाख १८ । इलाम–२ मा शनिवार सम्पन्न उप–निर्वाचनमा एमालेका युवा उम्मेदवार सुहाङ नेम्बाङ विजयी भएका छन् । योसंगै नेकपा एमालेले करिब तीन दशकदेखि चुनाव जित्दै आएको आफ्नो विरासत जोगाएको छ ।
मंगलवार बिहान साढे ४ बजे जारी अन्तिम मतपरिणाम अनुसार नेकपा एमालेका उम्मेदवार सुहाङ नेम्वाङ २७ हजार ७ सय ७२ मत पाएर विजयी भएका छन् भने उनका निकटतम प्रतिद्वन्द्वी नेपाली कांग्रेसका डम्बरबहादुर खड्काले २१ हजार ९ सय ४२ मत पाएर पराजित भए ।
२०७९ को निर्वाचनमा उनी सुवास नेम्वाङसँग ११४ मत कम ल्याएर हारेका थिए भने अहिले नेम्वाङ पुत्र सुहाङले ५ हजार ८ सय ३० मतान्तरले हराएका छन् ।
‘निर्वाचनमा विजयी भएपछि मतदाताहरुलाई धन्यवाद दिँदै सुहाङले भनेका छन्– ‘यो जीतको सम्पूर्ण श्रेय मेरा इलामेली जनता र मेरो पार्टी नेकपा एमालेलाई दिन चाहन्छु । पार्टीले अवसर र जनताले भोट नदिएको भए यो जीत सम्भव थिएन ।’
२०८० भदौ २७ मा पूर्व सभामुख तथा पूर्व संविधानसभा अध्यक्ष सुवासचन्द्र नेम्वाङको निधन भएपछि इलाम–२ रिक्त भएको थियो ।
निर्वाचनको अन्तिम परिणामअनुसार पहिचानवादी शक्ति तेस्रो शक्तिको रुपमा उदाएको छ । प्रदेश–१ लाई कोशी प्रदेश नामाकरण गरेको विरोधमा आन्दोलित पूर्वका जनजातिहरुका साझा उम्मेदवार पहिचानवादी नेता डकेन्द्र सिं थेगिमले ११ हजार ४५७ मत पाएका छन् ।
राष्ट्रिय स्वतन्त्र पार्टीका मिलन लिम्बूले ५ हजार ५० मत पाएर चौथो स्थानमा खुम्चिएका छन् ।
यो क्षेत्रमा कुल मतदाता १ लाख १५ हजार ८ सय ८९ रहेको यो क्षेत्रमा करिव ६९ हजार २ सय ८७ मत खसेको थियो ।
