मुम्बई, वैशाख ३ । आइतवार बिहान ५ बजेको समयमा समियमा बान्द्रास्थित सलमान खानको ग्यालेक्सी अपार्टमेन्टमा लक्षित गर्दै गोली चलाइएको थियो । दुई वटा मोटरसाइकलमा आएका आक्रमणकारीले ४ राउण्ड फायर गरेका थिए । गोलीबारी हुँदा सलमान आफ्नै घरमा थिए ।
उक्त घटनापछि महाराष्ट्रका मुख्यमन्त्री एकनाथ शिन्देले सलमान खानसँग फोनमा कुरा गरेका थिए । शिन्देले मुम्बईका प्रहरी आयुक्तलाई सलमानको सुरक्षा बढाउन निर्देशन दिएका छन् । हाल अभिनेता खानको घरबाहिर सुरक्षा बढाइएको छ ।
यसैबीच, एउटा भिडियो बाहिरिएको छ, जसमा सलमान खानको घर ग्यालेक्सी अपार्टमेन्ट बाहिरको गतिविधि देख्न सकिन्छ । भिडियोमा दुवै आक्रमणकारीले गोली हानेको देखिन्छ । गोली चलाउनेहरुको तस्विर पनि प्रहरीले सार्वजनिक गरेको छ ।
मुम्बई प्रहरी स्रोतका अनुसार गोली चलाइएको बन्दुक ७.६ बोरको थियो । फोरेन्सिक विज्ञहरूले घटनास्थलबाट गोली फेला पारेका छन् । प्रहरीले आरोपीको मोटरसाइकलसमेत नियन्त्रणमा लिएको छ । फोरेन्सिक टोलीले यसको अनुसन्धान गरिरहेको छ ।
दुबै अभियुक्त राज्य बाहिरका हुन सक्ने र उचाई ५ फिट ८ इन्च हुन सक्ने प्रहरीले जनाएको छ । प्रहरीले सलमानको घरबाहिर राखिएका सबै सीसीटीभी क्यामेराको डीभीआर जफत गरेको छ ।
घटनाको जिम्मेवारी लरेन्स बिश्नोई समूहले लिएको छ । एक फेसबुक पेजमा उक्त घटनाका बारेमा जिम्मेवारी लिएको सार्वजनिक भएको छ, जसमा सलमानमाथि भविष्यमा पनि आक्रमण हुनसक्ने लेखिएको छ ।
यद्यपि, उक्त पोस्टको प्रहरीले पुष्टि गरिसकेको भने छैन । थप जानकारी प्रहरीले अझै दिएको छैन । घटनाको अनुसन्धान भैरहेको प्रहरीको भनाइ छ ।
