काठमाडौं, माघ २३ । पुस महिनामा मूल्य वृद्धि दर (मुद्रास्फिति) ५.२६ प्रतिशत रहेको छ ।
नेपाल राष्ट्र बैंकले मंगलबार सार्वजनिक गरेको चालु आर्थिक वर्षको ६ महिनासम्मको तथ्यांक अनुसार वार्षिक विन्दुगत उपभोक्ता मुद्रास्फीति ५.२६% रहेको छ । मंसिर महिनामा वार्षिक विन्दुगत उपभोक्ता मुद्रास्फीति ४.९५ प्रतिशत थियो । एक महिनामा मूल्य मूल्य वृद्धि दर ०.३१ प्रतिशतले बढेको हो ।
साथै, अघिल्लो वर्षको पुसको तुलनामा भने यो वर्ष मुद्रास्फीति २ प्रतिशतले घटेको हो । अघिल्लो वर्षको सोही महिनामा भने यस्तो मुद्रास्फीति ७.२६ प्रतिशत रहेको थियो । समीक्षा महिनामा खाद्य तथा पेय पदार्थ समूहको मुद्रास्फीति ५.७७ प्रतिशत र गैर–खाद्य तथा सेवा समूहको मुद्रास्फीति ४.८५ प्रतिशत रहेको छ ।
समीक्षा महिनामा खाद्य तथा पेय पदार्थ समूहअन्तर्गत मरमसला उप–समूहको वार्षिक विन्दुगत उपभोक्ता मूल्य सूचकांक ३५.६० प्रतिशत छ । खाद्य तथा खाद्यजन्य पदार्थको ११.३८ प्रतिशत, तरकारीको १.०४ प्रतिशत छ । त्यस्तै, दुग्ध पदार्थ तथा अण्डाको १०.२९% छ । घ्यू तथा तेल उप–समूहको वार्षिक विन्दुगत मूल्य सूचकांक भने १३.०७ प्रतिशत छ ।
पुस महिनासम्ममा काठमाडौं उपत्यकाको वार्षिक विन्दुगत उपभोक्ता मुद्रास्फीति ५.७६ प्रतिशत छ । तराईको ४.७८ प्रतिशत, पहाडको ५.४० प्रतिशत र हिमालको ६.५७ प्रतिशत रहेको छ ।
