काठमाडौँ, माघ २१ । अपर तामाकोशी हाइड्रोपावरको हकप्रद शेयरको लिलामीमा नपरेको रकम भोलि सोमबारबाट लगानीकर्ताको खातामा जम्मा हुने भएको छ । अपरको हकप्रद शेयर लिलामीको प्रबन्धक नागरिक लगानी कोषका पुँजी बजार प्रमुख नारायण घिमिरेले भोलिबाट लिलामीमा नपरेको शेयरबापतकाे रकम फिर्ता गर्ने बताए ।
‘भोलिदेखि फिर्ता गर्ने प्रक्रिया शुरु भएर १–२ दिनमा सबैले रकम फिर्ता पाउँछ । लक्ष्मी सनराइज बैंकमा खाता हुनेले भोलि नै पाए पनि अन्य बैंकमा खाता हुनेले पनि १–२ दिनमै नपरेको रकम फिर्ता पाउनेछ ।’–उनले भने ।
उनका अनुसार अपर तामाकोशीको लिलामीमा १ सय ४७ रुपैयाँ मूल्य राखेकाले आंशिक शेयर पाएका छन् । लगानी कोषका अनुसार १ सय ४७ रुपैयाँ मूल्य राखेर आवेदन दिएकाले मागको ५५ प्रतिशत शेयर प्राप्त गरेका छन् भने १ सय ४७ रुपैयाँ भन्दा बढी मूल्य राखेर शेयर मूल्य राखेकाले माग गरे जति नै शेयर प्राप्त गरेका छन् ।
अपर तामाकोशीले १ बराबर १ को अनुपातमा हकप्रद शेयर निष्काशन गर्दा नबिकेको १ करोेड ७० लाख १९ हजार ५ सय ३० कित्ता शेयर लिलामीमा राखेको थियो । लिलामीमा ३० हजार भन्दा बढी लगानीकर्ताले भाग लिएका थिए भने नगदै ७ अर्ब र चेकमार्फत ७ अर्ब गरेर करिब १४ अर्ब रुपैयाँ रकम जम्मा भएको थियो ।
कोषले १० अर्ब रुपैयाँ भन्दा बढी रकम लगानीकर्तालाई फर्काउनुपर्छ । लिलामी नपरेको रकमको करिब ७० प्रतिशत रकम पुनः दोस्रो बजारमा फर्किने र यसले बजारमा शेयरको माग बढ्ने अपेक्षा गरिएको छ ।
Published Date: 04 February 2024
