मुम्बई, माघ १५ । अभिनेत्री परिणीति चोपडाले गायन क्षेत्रमा व्यवसायिक यात्राको थालनी गरेकी छिन् । उनले एउटा भिडियो शेयर गर्दै उक्त कुराको जानकारी दिएकी हुन् ।
परिणीतीले पहिलादेखि नै गायिका बन्न चाहेको बताइन् । उनले गायनलाई लिएर सधैँ मरिमेट्ने गरेको पनि बताइन् । उनले स्टेजमा प्रस्तुति दिन आफूलाई अत्यधिक मन पर्ने पनि बताएकी छिन् ।
जीवनको यो नयाँ अध्यायले आफू भाग्यमानी, आशीर्वाद प्राप्त भए झैँ भएको अनुभव गरेको परिणीति बताउँछिन् । यो एउटा त्यस्तो यात्रा हो जहाँ उनी दुई करियर अपर्चुनिटीको महसुस गरिरहेको बताएकी छिन् ।
परिणीति लेख्छिन्- ‘मैले प्रायः मानिसलाई स्टेजमा प्रस्तुति गर्दै गरेको देखेको छु । त्यसैले म आफ्नो डरलाई अगाल्न जाँदैछु । आफ्नो गायन क्षेत्रमा डेब्यू गर्दै छु ।’
प्रशंसकले उनको यो नयाँ मोडको बारेमा विभिन्न टिका- टिप्पणी गरेका छन् । ति मध्ये धेरैले अभिनय छाडेको, विवाहपछि नयाँ करियर शुरु गरेको उल्लेख गरेका छन् ।
परिणीतिको ‘केसरी ‘ पछि रिलिज भएको जबरिया जोडि, संदीप और पिंकी फरार, मिशन रानीगञ्ज,कोड नेम तिरंगा,उचाईले लगायतका फिल्महरु बक्स अफिसमा नराम्रो प्रदर्शन गरेका थिए ।
त्यसैले फ्यानहरुले परिणीतिले गायन करियरलाई नयाँ अप्शनको रुपमा छनौट गरेको भन्ने प्रतिक्रिया दिएका छन् । यद्यपि उनले पहिला पनि विभिन्न फिल्महरुमा गीत गाइसकेकी थिइन् तर अब भने प्रोफेशनली गायनलाई जारी राख्न चाहान्छिन् । परिणीतिले २०२३ को सेप्टेम्बरमा राघव चढ्डासंग विवाह गरेकी थिइन् ।
Published Date: 29 January 2024
