तनहुँ, माघ ७ । तनहुँको सदरमुकाम दमौली बजार क्षेत्रमा मुग्लिन–पोखरा सडकको पूर्वी भागमा रहेका घर भत्काउने काम सुरू भएको छ ।
भत्काइनुपर्ने ७० घरमध्ये ४५ परिवारले मुआब्जाको पहिलो किस्ता पाएपछि घर आफै भत्काउन थालेका छन् । मुग्लिङ–पोखरा पूर्व खण्डका इन्जिनियर विष्णुप्रसाद पाण्डेले घर भत्काएर दोस्रो किस्ता बुझाइने बताए ।
उनका अनुसार दमौली बजार क्षेत्रका घर मुआब्जाका लागि करिब ६ करोड रुपैयाँ खर्च हुनेछ । ‘पहिलो चरणमा सबैले मुआब्जा लिने हो भने ६० प्रतिशत बाँड्छ’, उनले भने, ‘आगामी डेढ महिनाभित्र दमौली बजार क्षेत्रका घर भत्काइसक्ने लक्ष्य छ ।
उनका अनुसार जिल्लाको बन्दीपुर गाउँपालिकाको डुम्रे बजार क्षेत्रदेखि सडक विस्तार भएपछि दमौली बजार क्षेत्रमा काम अघि बढाइने छ ।
आयोजनाले घर भत्काउन आग्रह गरेको, समय–समयमा बैठक बसेर नगरपालिकालाई घर भत्काउन प्रोत्साहन गरेको उनले बताए ।
