भक्तपुर, माघ ४। भक्तपुरमा यहि मिति २०७९ साल माघ ५ गते देखि ७ गतेसम्म भक्तपुर बुक क्लबको आयोजनामा हुन लागेको स्टुडेन्टस् बुक फेयरको बारेमा क्लबका अध्यक्ष दिनेश प्रधानसंग आइकन खबर डट कमले गरेको कुराकानीमा आधारित प्रश्न उत्तर :
१. पछिल्लो समयमा भक्तपुर बुक क्लबको बारेमा धेरै चर्चा भईरहन्छ । सर्वप्रथम यस कल्बको छोटो परिचय दिनुहोस।
– भक्तपुर बुक क्लब किताबलाई माया गर्ने र पुस्तक अध्ययन गर्न रुचाउनेहरुको समूह हो । यसले मासिक रुपमा विगत एक वर्ष देखि अन्तरसंवाद नामको अन्तरक्रिया कार्यक्रम गर्दै आएको छ ।
२. स्टुडेन्टस् बुक फेयरको आयोजना हुन लागेको छ, यसको सोच कसरि आएको हो ? कुन उद्देश्यले भक्तपुर बुक क्लबले यो बुक फेयर आयोजना गरेको हो?
– हामीले लेखकसंग अन्तरसंवाद नामले पठन संस्कृतिवारे कार्यक्रम गरि रहदा उपस्थित दर्शक, युवा अझै विद्यार्थीहरु कम मात्रै पायौँ । यसले हामीलाई विद्यार्थी र युवाहरु पुस्तकबाट टाढा भएको हो की भन्ने लागेको छ र विद्यार्थीहरुलाई नै ध्यानमा राखेर विशेष कार्यक्रम गर्ने उद्देश्यले यो हुँदैछ ।
३. विकसित प्रविधिसंगै आजभोलिका विद्यार्थीले अनलाईन मार्फत पठन पाठन गर्ने बानी बसालिरहेको अवस्थामा यस बुक फेयरको आकर्षण कस्तो हुने पाउनुभएको छ ?
– प्रविधि मैत्री हुने नाममा हामी डिजिटल ग्याजेटहरुको अघोषित रुपमा दास हुँदैछौँ । युवा र विद्यार्थी मात्रै होइन अभिभावक समेत यसमा अछुटो रहेन । हामीले पुस्तकको साथै अन्य सृजनात्मक कार्यक्रमहरु पनि सँगै गदैछौ र विद्यर्थीहरुको राम्रो उपस्थिती हुनेमा आशावादी छौँ ।
प्रविधि मैत्री हुने नाममा हामी डिजिटल ग्याजेटहरुको अघोषित रुपमा दास हुँदैछौँ
४. यस बुक फेयर कुन उमेर समूहलाई आधार मानेर आयोजना गर्दै हुनुहुन्छ ?
– पुस्तकहरु विद्यर्थी र अभिभावक माझ आम पुस्तक प्रेमीहरुलाई ध्यानमा राखेर प्रकाशकहरुका पुस्तक स्टलहरु रहेका छन तर कार्यक्रमहरु भने विद्यार्थी लक्षित रहेका छन् ।
५. यस बुक फेयरका आकर्षण हरु के के हुनेछन?
– पुस्तक त यसको मुख्य आकर्षण नै भैहाल्यो । त्यसका साथै विद्यर्थीहरु बीचको पुस्तक संवाद , कविता गोष्ठी,बालबालिकाको पोषणबारे , अभिभावक शिक्षा, बालबालिकाको लाइभ कार्टुन क्यारिकेचर , बाल चलचित्र प्रदर्शनी , नेवारी खाजाको योमरी स्टल , चित्रकला तथा मूर्तिकला कार्यक्रमका आकर्षण हुन् ।
६. यस पुस्तक मेला मार्फत भक्तपुर बुक फेयरको अपेक्षा के रहेको छ ?
– युवा र विद्यार्थीहरु माझ पठन संस्कृतिको विकाश नै हाम्रो अपेक्षा रहेको छ । विद्यर्थीहरुले अझैँ सृजनशिल काममा सहभागी होस भन्ने हाम्रो चाहना हो ।
७. यस मेलामा कुन कुन ठाउँबाट र कति जनाको सहभागिता रहने अपेक्षा गर्नुभएको छ ?
– भक्तपुर, ठिमी र बनेपाका सामुदायिक तथा नीजि विद्यालयका विद्यार्थी, अभिभावक एव पुस्तक प्रेमीहरु सहभागी हुने आशा गरेका छौं । आफैले भेटेरै वा कति ठाउँमा पत्राचार गरेरै सहभागी हुन अनुरोध गरेका छौं ।
८. भक्तपुर बुक क्लबले आगामी दिनको लागि कस्ता खालका योजनाहरु बनाएको छ ?
– हाम्रा नियमित अन्तरसंवाद कार्यक्रम जारी नै रहने छ । साथै भविष्यमा लेखन सम्बन्धि कार्यशाला गोष्ठी र केही विद्यार्थीहरु लक्षित साहित्यिक प्रतियोगिता गर्ने हाम्रो योजना रहेको छ ।
