काठमाडौँ, कार्तिक ३० । अमेरिकी राष्ट्रपति जो बाइडेनले चिनियाँ राष्ट्रपति सी चिनफिङबारे फेरि विवादास्पद अभिव्यक्ति दिएका छन् । क्यालिफोर्नियामा एसिया-प्रशान्त आर्थिक सहयोग(एपेक) को शिखर सम्मेलनमा चिनियाँ समकक्षी सीसँगको भेटपछि आयोजित पत्रकार सम्मेलमा अमेरिकी राष्ट्रपति बाइडेनले सीलाई पुन: ‘तानाशाह’ को संज्ञा दिएका हुन् ।
यसअघि यसै वर्षको जुनमा दुई देशबीच उच्च तहको कुराकानी भएको भोलिपल्टै बाइडेनले सीलाई ‘तानाशाह’ भनेका थिए । अमेरिकी हवाई क्षेत्रमा चीनले जासुसी बेलुन उडाएको आरोप लगाउँदै सीलाई उनले ‘तानाशाह’ को ‘उपमा’ दिएका थिए । उनको टिप्पणीलाई चीनले ‘गैरजिम्मेवारपूर्ण र बेवकुफी’ अभिव्यक्तिको संज्ञा दिएको थियो ।
यस पटक चिनियाँ राष्ट्रपतिसँग निकै प्रभावकारी संवाद भएको बताइरहेका बेला बाइडेनको विवादास्पद भनाइ बाहिर आएको हो । अहिलेसम्म यसबारेमा बेइजिङले केही प्रतिक्रिया जनाएको छैन । चिनियाँ सञ्चारमाध्यमले पनि विश्वका दुई प्रभावशाली नेताबीच सौहार्दपूर्ण र प्रभावकारी संवाद भएको जनाएका छन् ।
Published Date: 16 November 2023
