काठमाडौँ, कार्तिक १४ । चलचित्र ‘दयारानी’ को रिलिज डेट तोकिएको छ । अभिनेता दयाहाङ राई र अभिनेत्री दीया पुनको मुख्य भुमिका रहेको फिल्म आगामी माघ २६ गतेबाट प्रदर्शनमा आउने पक्का भएको हो ।
मंगलबार एक पोस्टर सार्वजनिक गर्दै बाँसुरी फिल्मसले दया रानीको नयाँ प्रदर्शन मिती घोषणा गरेको हो । माओत्से गुरुङ निर्देशित यो फिल्म विभिन्न देशमा प्रदर्शन भैसकेको छ । कलाकार गुरुङले यही फिल्मबाट निर्देशनमा डेव्यु गरेका हुन् । फिल्ममा दया र दिया सँगै विजय बराल, प्रमिसा गुरुङ, पुस्कर गुरुङ, टिकाराम घले लगायतका कलाकारहरुको अभिनय छ ।
बाँसुरी फिल्मस् र माओत्से फिल्मस्को ब्यानरमा निर्मित फिल्मले खराब श्रीमान र दयालु श्रीमती बीचको कथा भन्नेछ । फिल्मलाई शैलेन्द्र ध्वज कार्कीको खिचेका हुन् । गुरुङ समुदायमा दयालु यूवतीलाई दयारानी भन्ने गरिन्छ । फिल्ममा अभिनेत्री दीया पुनलाई दयालु युवतीको रुपमा प्रस्तुत गरिएको छ ।
मोहन गुरुङ, किरण गुरुङ, केन्द्र लिम्बु र न्यू आइटी भेन्चरको सहकार्यमा निर्माण भएको फिल्मका कार्यकारी निर्माता रामबाबु गुरुङ र अपिल विष्ट हुन् । फिल्मको कास्टिङ डारेक्टर मणिराम पोखरेल हुन् ।
Published Date: 31 October 2023
