लण्डन, कार्तिक १२ । अभिनेत्री मनीषा कोइराला बेलायतको राजधानी लण्डनमा सम्मानित भएकी छन् । बेलायतको एसियन स्ट्यान्डर्ड पत्रिकाले शुक्रबार लण्डनमा रहेको बेलायती संसद् हाउस अफ कमन्समा आयोजित विशेष समारोहमा कोइरालालाई सम्मान गरेको हो ।
बेलायतको ब्राडफोर्ड इस्ट क्षेत्रका सांसद इमरान हुसेन तथा एसियन स्ट्यान्डर्डकी प्रधान सम्पादक फतिमा पटेलले अभिनेत्री कोइरालालाई सम्मानित गरेकी हुन् । पत्रिकाले अभिनेत्री कोइरालाको फिल्म, कला र सामाजिक सेवामा उल्लेखनीय योगदानका लागि उक्त सम्मान गरिएको जनाएको छ ।
निःशुल्क वितरण गरिने उक्त पत्रिका दक्षिण एसियाली समुदायबीच अति लोकप्रिय छ । पत्रिकाले दक्षिण एसियाली समुदायका विभिन्न व्यक्तित्वलाई उनीहरुको योगदानको कदर गर्दै सम्मान गर्दै आएको छ ।
अभिनेत्री कोइरालालाई सम्मानित गरेपछि सांसद हुसेनले कोइरालाले तीन दशक बढी समयमा कला क्षेत्रमा गरेको योगदान प्रशंसनीय रहेको बताएका छन् ।