काठमाडौं, असोज २० । काठमाडौं महानगरपालिकाले दशैंका लागि राजधानीमा बिक्री गरिने खसीबोकाको स्वास्थ्य परीक्षण गर्ने भएको छ ।
कामनपाले असोज २३ गतेदेखि स्वास्थ्य परीक्षण सुरु गर्ने भएको छ । विगतका वर्षहरूमा कामनपाले घटस्थापनाको दिनदेखि नवमीसम्म मात्रै स्वास्थ्य परीक्षण गर्ने लक्ष्य राखेको थियो । यो वर्ष चाँडै सुरु हुने भएको छ ।
कामनपाले घरपालुवा जनावरको कलङ्की, टुकुचा, बालाजु, कोटेश्वर र नेपाल खाद्य संस्थानको बिक्री केन्द्रमा स्वास्थ्य परीक्षण गर्ने तयारी गरेको छ ।
कामनपाको कृषि तथा पशुपन्छी विभाग, पशुचिकित्सक, कामपा प्रहरी र सम्बन्धित वडाको समन्वयमा बाख्राको निरीक्षण र परीक्षण गरिने कामनपा कृषि विभागका प्रमुख डा अवधेश झाले जानकारी दिए । अनुगमनपछि स्वस्थ बाख्राका सीङलाई हरियो र अस्वस्थ बोकालाई रातो रंग दिइने उनले बताए ।
Published Date: 07 October 2023
