मलेखु (धादिङ), असोज १७ । धादिङको गजुरी गाउँपालिका–२ मलेखुमा ट्रकको ठक्करबाट दुई विद्यार्थीको मृत्यु भएको छ ।
ट्रकले ठक्कर दिँदा सिद्धलेक गाउँपालिका–६ का विद्यालयका विद्यार्थी निर्मल श्रेष्ठ र सञ्जीव श्रेष्ठको घटनास्थलमै मृत्यु भएको जिल्ला प्रहरी कार्यालयका प्रहरी नायब उपरीक्षक शान्तिलालप्रसाद जैसवालले जानकारी दिए ।
काठमाडौंबाट चितवन जाँदै गरेको प्रान्त ०२–००१ ख ६४१३ नम्बरको ट्रकले आज बिहान विद्यार्थीलाई ठक्कर दिएको थियो । मृतक दुवै जना बागेश्वरी माविमा कक्षा ८ मा अध्ययनरत थिए ।
मुआब्जाको माग गर्दै आक्रोशित स्थानीयले पृथ्वी राजमार्गमा सवारी आवागमन अवरुद्ध गरेका छन् । ट्रक चालक रौतहटको चन्द्रपुर नगरपालिका–२ का ४१ वर्षीय अशोक बमजनलाई प्रहरीले नियन्त्रणमा लिएको छ ।
