काठमाडौं, असोज १ । सरकारले १०३ प्रकारका एन्टिबायोटिक औषधि प्रयोग नगर्न उपभोक्ता तथा सरोकारवालालाई निर्देशन दिएको छ ।
औषधि प्रशासन विभागका महानिर्देशक नारायणप्रसाद ढकालले एन्टिबायोटिक औषधिको प्रयोग न्यूनीकरण, रोकथाम र नियन्त्रणका लागि निर्देशन दिइएको बताए ।
विश्व स्वास्थ्य संगठनले पनि यी औषधिहरूको प्रयोग गर्न सिफारिस गरेको छैन। ढकालले यी एन्टिबायोटिक प्रयोग गर्नुमा कुनै औचित्य नभएको बताए । “डब्लुएचओले प्रयोग गर्न नहुने १०३ प्रकारका एन्टिबायोटिक्सको सूची प्रकाशित गरेको छ। हामीले यी औषधिहरू दर्ता गर्ने वा प्रयोग गर्न अनुमति दिने छैनौं,” उनले थपे।
उनका अनुसार १ सय ३ एन्टिबायोटिक औषधिमध्ये १३ प्रकारको दर्ता भएको छ ।
विभागले रोगको दर, मृत्यु दर र एन्टिबायोटिक प्रतिरोधको कारणले हुने आर्थिक नतिजालाई कम गर्न राष्ट्रिय कार्य योजना तयार गरेको बताएको छ, जुन एन्टिबायोटिक प्रतिरोधमा विश्वव्यापी कार्य योजनासँग मिल्दोजुल्दो छ। योजना स्वीकृतिको अन्तिम चरणमा रहेको बताइएको छ ।
एन्टिबायोटिक औषधिको दर्ता र नविकरण नगर्न र पैठारी नगर्न सम्बन्धित निकायलाई निर्देशन दिइएको ढकालले बताए । औषधि सल्लाहकार समितिको सिफारिसमा यो निर्देशन जारी गरिएको उनले बताए ।
Published Date: 18 September 2023
