नयाँदिल्ली, भदौ १८ । चीनका राष्ट्रपति सी चिनफिङ भारतमा यसै साता हुने जी–२० को शिखर सम्मेलनमा सहभागी नहुने भएका छन् । सोमबार चिनियाँ विदेश मन्त्रालयले सी सम्मेलनमा नआउने पुष्टि गरेको हो । राष्ट्रपति सीको सट्टा चिनियाँ प्रधानमन्त्री ली चियाङ दिल्ली आउने भएका छन् ।
जी–२० को शिखर सम्मेलन सेप्टेम्बर ९ र १० मा नयाँदिल्लीमा हुँदै छ । चीनको विदेश मन्त्रालयका प्रवक्ता माओ निंगले संक्षिप्त बयान जारी गर्दै सीको अनुपस्थितिबारे जानकारी दिएका हुन् । यद्यपि, उनी भारत नआउनुको कारण भने खुलाइएको छैन ।
यसै साता इन्डोनेसियामा हुने आसियान शिखर सम्मेलनमा पनि सीले भाग नलिने बताइएको छ । जी–२० सम्मेलनमा रुसी राष्ट्रपति भ्लादिमिर पुटिन पनि नआउने घोषणा भइसकेको छ । युक्रेनसँगको युद्धका कारण पुटिन अन्तर्राष्ट्रिय मञ्चहरूमा कमै उपस्थित भएका छन् । जी–२० सम्मेलनमा रुसको प्रतिनिधित्व विदेशमन्त्री सर्गेई लावरोभले गर्नेछन् । हालै मात्र दक्षिण अफ्रिकाको जोहानेसबर्गमा भएको ब्रिक्स सम्मेलनमा पनि पुटिनले भाग लिएनन् ।
Published Date: 05 September 2023
