गोरखा, भदौ १ । उपप्रधानमन्त्री तथा गृहमन्त्री नारायणकाजी श्रेष्ठले वर्तमान सरकारले चालेको भ्रष्टाचारविरुद्धको अभियानमा निर्दोषलाई कारबाही नहुने र दोषीलाई छाड्न नदिने आश्वासन दिएका छन् ।
गोरखामा आयोजित एक कार्यक्रममा बोल्दै उपप्रधानमन्त्री श्रेष्ठले वर्तमान सरकार सत्तामा रहेसम्म भ्रष्टाचारविरुद्धको अभियानलाई प्रभावकारी रूपमा निरन्तरता दिइने बताए ।
उनले अनुसन्धान र प्रमाणका आधारमा दोषीलाई कानुनी कठघरामा ल्याउने प्रतिबद्धता जनाउँदै ऋण पीडितलाई न्याय दिने अभियान पनि अघि बढेको बताए ।
उपप्रधानमन्त्री श्रेष्ठले मुलुकमा भएका राजनीतिक परिवर्तनका क्रममा शान्ति सुरक्षा कायम हुने र सर्वसाधारणका दैनिक आवश्यकता पूरा भएर नयाँ जीवनको अनुभूति गर्न सक्ने गरी समाज रुपान्तरण गर्न चाहेको बताए ।
उनले भने, ‘हामी यस्तो राष्ट्र निर्माण गर्न चाहन्छौं जहाँ भ्रष्टाचारी, अपराधी र तस्करले आफ्नो दिन सकियो भन्ने महसुस गरोस ।
सुशासन र समृद्धिको अभियानलाई मुलुकको सामाजिक–आर्थिक रुपान्तरणको प्रमुख एजेण्डाका रुपमा राखेर सङ्घीय सरकारले अगाडि बढेको उनको भनाइ थियो ।
गृहमन्त्री श्रेष्ठले भने, ‘सुशासन कायम गर्ने र नागरिकलाई विकासको प्रतिफल दिने दृढ संकल्पका साथ अगाडि बढ्छौं ।