काठमाडौं, साउन २२ । यही भदौ १ गतेदेखि प्रदर्शनमा आउने नयाँ नेपाली फिल्म ‘जुलेबी’ को ट्रेलर सार्वजनिक गरिएको छ ।
दुई मिनेट लामो ट्रेलरले दर्शकलाई थप कौतुहल बनाउने देखिएको छ । ट्रेलरमा समावेश गरिएका दृष्यले यो फिल्म यौन मनोविज्ञानमा केन्द्रित रहेको अनुमान गर्न सकिन्छ ।
फिल्मका लेखक तथा निर्देशक गणेश देव पाण्डेका अनुसार यो फिल्मका पात्रहरुलाई रत्नपार्कले जोड्छ । फिल्मको कथा सात जना पात्रहरुको सम्बन्धको वरिपरि घुमेको छ ।
फिल्मका लेखक तथा निर्देशकले यो फिल्म आफ्नो जीवनको भोगाइबाट उत्पन्न भएको कथा आधारित भएको बताएका छन् ।
चार जना महिला पात्रको कथा रहेको फिल्मको निर्माता पनि महिला नै हुन् । महिलाले भोग्ने सम्बन्धको कथा नै फिल्मले बोल्ने निर्माता आभा शर्मा नेपालले बताइन् ।
कार्यकारी निर्माता नवीन भट्ट रहेको यो फिल्मत्र फोर क्युब इन्टरटेन्मेन्टको ब्यानरमा निर्माण भएको हो, जसमा सुरक्षा पन्त, निशा अधिकारी, उषा रजक, मोनिका थापा, सुशील सिटौला, पुष्कर कार्की, तुफान थापा, समीरमणी दिक्षितलगायतको अभिनय छ ।
विवेक खड्काको छायांकन, जाटवेद बनर्जीको संगीत, अन्जय खड्काको सम्पादन र साउण्ड डिजाइन उत्तम न्यौपानेको रहेको छ । डिसीएन र रिच इन्टरटेन्टमेन्टले वितरणको जिम्मा लिएको फिल्मको डिजिटल अधिकार डिएआर मुभिजले खरिद गरेको छ ।
https://youtu.be/fNzMj7YgRLI
Published Date: 07 August 2023
