काठमाडौं, साउन २१ । इंग्लिस क्लब म्यानचेस्टर युनाइटेडले प्रि-सिजनको मैत्रीपूर्ण खेलमा फ्रान्सेली क्लब आरसी लेन्सलाई पराजित गरेको छ ।
घरेलु मैदान ओल्ड ट्राफर्डमा भएको खेलको पहिलो हाफमा १-० ले पछि परेको स्थितिबाट दोस्रो हाफमा पुनरागमनका साथ युनाइटेडले ३-१ को जित दर्ता गरेको हो । युनाइटेडका लागि मार्कस रासफर्ड, एन्टोनी र क्यासेमिरोले १-१ गोल गरे ।
लेन्सले खेलको २३ औं मिनेटमा फ्लोरियन सोटोकाको गोलमा अग्रता लिएको थियो । मैदानको मध्यभागबाट उनले गरेको प्रहारमा गोलरक्षक आन्द्रे ओनाना बिट भएका थिए । मिडफिल्डमा युनाइटेडले बल फुस्काएपछि सोटोकाले सिधै पोस्टमा प्रहार गरेका थिए ।
दोस्रो हाफको ४९ औं मिनेटमा युनाइटेडले बराबरी गोल फर्कायो । एन्टोनीको पासमा रासफर्डले पेनाल्टी क्षेत्रबाट फिनिस गर्दै खेललाई १-१ को स्थितिमा ल्याए ।
त्यसको ४ मिनेटपछि नै एन्टोनीले आफैं गोल गर्दै युनाइटेडलाई अग्रता दिलाए । क्यासेमिरोले ५९ औं मिनेटमा अर्को गोल थप्दै युनाइटेडको जित पक्का गरे ।
युनाइटेडले अब भोली मैत्रीपूर्ण खेलमा एथ्लेटिक बिल्बाओसँग खेल्नेछ । त्यसपछि टोलीले अगस्ट १५ मा लिगको पहिलो खेलमा वल्भ्सको सामना गर्नेछ । –एजेन्सी
