विराटनगर, साउन १७ । कोशी प्रदेशका नवनियुक्त मुख्यमन्त्री उद्धव थापाको आज हुने सपथ ग्रहण कार्यक्रम साँझ ५ बजेसम्मका लागि सारिएको छ ।
यसअघि बिहान १०ः३० बजे मुख्यमन्त्री थापालाई पद तथा गोपनियताको सपथ गराउने तयारी गरिएको थियो ।
नेपाली कांग्रेस संसदीय दलका नेता थापालाई नेकपा (माओवादी केन्द्र), नेकपा (एकीकृत समाजवादी) पार्टी र जनता समाजवादी पार्टी (जसपा)को समर्थनमा मंगलबार मुख्यमन्त्रीमा नियुक्त गरिएको हो । नेपाली कांग्रेसका प्रमुख सचेतक भूपेन्द्र राईले मन्त्रालयको बाँडफाँडको टुङ्गो नलागेकाले सपथ ग्रहणको समय सारिएको बताए ।
‘थापासँगै आज वाम गठबन्धनका एक मन्त्रीले पनि सपथ लिने तयारी गरिरहेका छन् । विगतमा विभागविहीन मन्त्री नियुक्त हुन्थ्यो; अब उनीहरुलाई नियुक्ति भएपछि मन्त्रालय दिने तयारी भइरहेको छ,’ प्रमुख सचेतक राईले भने ।
सत्तारुढ गठबन्धनभित्र नेकपा (माओवादी केन्द्र)ले आर्थिक मामिला तथा योजना मन्त्रालयको दाबी गर्ने सहमति भएको छ ।
नेकपा (एकीकृत समाजवादी) पार्टीले भौतिक पूर्वाधार मन्त्रालयमा दाबी गरेको छ । तर, मुख्यमन्त्री थापा नेकपा (एकीकृत समाजवादी)लाई भौतिक पूर्वाधार मन्त्रालय दिन तयार छैनन् ।