काठमाडौँ, साउन १४ । नयाँ सामाजिक सञ्जालका रूपमा आएको थ्रेड्सले केही दिनमै आधा प्रयोगकर्ता गुमाएको छ । प्रविधि कम्पनी ‘मेटा’ का मालिक मार्क जुकरबर्गले नयाँ सामाजिक प्लाटफर्म ‘थ्रेड्स’ का आधाभन्दा बढी प्रयोगकर्ता गुमाएको बताएका हुन् ।
ट्विटरको प्रतिस्पर्धीका रूपमा आएको थ्रेड्समा ५ दिनमै १० करोड प्रयोगकर्ता जोडिएका थिए । तर जुकरबर्गले केही दिनमै प्रयोगकर्ता घटेको स्विकारेका हुन् । ‘यदि तपाईंसँग १० करोडभन्दा बढी मानिस साइनअप छन्, त्यसको आधा पनि रोकिए पनि त्यसलाई आदर्श रूपमा राम्रै मानिन्छ । तर हामी त्यहाँ छैनौँ ।’
सार्वजनिक भएसँगै ‘लिमिटेड फिचर’ भएको भन्दै थ्रेड्सको आलोचना भएको थियो । त्यसपछि मेटाले निरन्तर केही नै केही फिचर थप्दै लगेको छ । त्यस्तै पोस्टहरू पनि विभिन्न भाषामा अनुवाद हुने फिचर पनि यसमा थपिएको छ ।
कम्पनीका प्रमुख उत्पादन अधिकृत क्रिस कोक्सले कर्मचारीहरूलाई प्रयोगकर्तालाई फिर्ता ल्याउन ‘रिटेन्सन-ड्राइभिङ हुक्स’ थप्न निर्देशन दिएका छन् ।
