काठमाडौं, असार २० । राष्ट्रपति रामचन्द्र पौडेललाई सहयोग गर्न भन्दै देशका विभिन्न स्थानमा एक रुपैयाँ संकलन अभियानको थालनी भएको छ । काठमाडौं तथा चितवनसहित विभिन्न जिल्लाका विद्यार्थीहरुले राष्ट्रपतिलाई उपचार खर्च भन्दै एक रुपैयाँ संकलन गर्ने अभियान थालेका हुन् ।
नेकपा एमालेनिकट अनेरास्ववियु चितवनले राष्ट्रपतिको सहयोगार्थ १ रुपैयाँ अभियान थालेको छ । यसबाहेक काठमाडौं, सुनसरी, मोरङसहितका जिल्लामा पनि राष्ट्रपतिका लागि १ रुपैयाँ संकलन अभियान चलाइने तयारी भैरहेको छ ।
राष्ट्रपति पौडेलले गत वैशाख ६ गतेदेखि १७ गतेसम्म भारतको दिल्लीस्थित एम्स अस्पतालमा उपचार गर्दा लागेको ५५ लाख २ हजार रूपैयाँ सरकारले दिनु पर्ने बताएका छन् । उपचारका लागि जाँदा एयर एम्बुलेन्सका रुपमा प्रयोग गरेको श्री एयरको जहाजको भाडा र आउँदाको खर्चसहित ५५ लाख २ हजार रुपैयाँ निकासाका लागि मंगलबार परारष्ट्र मन्त्रालयले अर्थ मन्त्रालयलाई पत्र लेखेको छ ।
यसअघि गत वैशाख १९ गते प्रेस संयोजक खिला कार्कीले उपचार खर्च राष्ट्रपति पौडेलले उक्त उपचार खर्च आफैं ब्यहोर्न चाहेको उल्लेख गरेका थिए ।
