काठमाडौँ, असार १९ । नेपालका स्पिनर सन्दीप लामिछानेले आइसिसी विश्वकप छनोटको प्लेअफ खेलमा आयरल्यान्डका ब्याटर ह्यारी टेक्टरको विकेट लिएका छन् । जितको लागि २ सय ६९ रनको विजयी लक्ष्य पछ्याएको आयरल्यान्डले २७ ओभरमा ५ विकेट गुमाउँदै १ सय ३६ रन बनाएको छ ।
कर्टिस क्याम्फर ८ र जर्ज डोकरेल १ रनमा क्रिजमा छन् । टेक्टर ७६ बलमा ४ चौका र २ छक्कासहित ६० रनमा क्याच आउट भए । उनी २६ औं ओभरको अन्तिम बलमा गुलशन झाबाट क्याच आउट भएका थिए । त्यसअघि टेक्टरकले सन्दीपको १५ औं ओभरको तेस्रो बलमा लङअनमा किशोर महतोले क्याच छाड्दा ब्यक्तिगत २१ रनमा जविनदान पाएका थिए ।
तीव्र गतिका बलर करण केसीले पाँचौं ओभरको पाँचौं बलमा ओपनर एन्डी म्याकब्रिनलाई १७ रनमा प्वाइन्टमा कुशल भुर्तेलबाट क्याच आउट भए । उनले १९ बलमा ३ चौका प्रहार गरे । अर्को ओभरमा किशोर महतोले कप्तान एन्डी बालबर्नीलाई प्वाइन्टमै एक रनमा दीपेन्द्रबाट क्याच गराएपछि राम्रो सुरुवात गरेको हो । आफ्नो ओडिआई करिअरको दोस्रो खेल खेलेका किशोरको यो पहिलो विकेट हो ।
गुलशनले १२ औं ओभरको अन्तिम बलमा ओपनर पल स्टरलिङलाई १५ रनमा बोल्ड आउट गरे । उनी एज लागेर बोल्ड हन पुगेका थिए । स्टरलिङले २४ बलमा २ चौका प्रहार गरे ।
