दोधारा चाँदनी, असार १३ । कञ्चनपुर जिल्लाका एक लाख ४७ हजारभन्दा बढी बालबालिकालाई दादुरा र रुबेला विरुद्धको खोप लगाइएको छ ।
जिल्ला स्वास्थ्य कार्यालय कञ्चनपुरले असार दोस्रो सातादेखि सञ्चालन गरेको खोप अभियानमा लक्ष्यभन्दा ३० प्रतिशतभन्दा बढी बालबालिकालाई दादुरा र रुबेला खोप लगाइएको छ ।
जिल्ला स्वास्थ्य कार्यालयका कोल्ड चेन अधिकृत जनक कुँवरले कार्यालयले ६ महिनादेखि १५ वर्षसम्मका एक लाख १८ हजार बालबालिकालाई खोप लगाउने लक्ष्य राखेको बताए ।
‘कुल १ लाख ४७ हजार ४५३ बालबालिकाले दादुरा र रुबेला विरुद्धको खोप लिएका छन्, जुन हाम्रो लक्ष्यभन्दा बढी हो’, उनले भने ।
छ महिनादेखि पाँच वर्षमुनिका ३९ हजार ३९३ बालबालिका र पाँच वर्षदेखि १५ वर्षसम्मका एक लाख ८ हजार ६० बालबालिकालाई दादुरा र रुबेलाविरुद्धको खोप लगाइएको छ ।
जिल्ला स्वास्थ्य कार्यालयले खोप अभियानका लागि जिल्लाभर ५ सय ६५ केन्द्र तोकेको थियो । दुई महिनाअघि कृष्णपुर नगरपालिकामा ३३ जना दादुराबाट पीडित भेटिएपछि कार्यालयले खोप अभियान सुरु गरेको हो ।
सरकारले सन् २०२६ सम्म दादुरा उन्मूलन गर्ने लक्ष्य राखेको छ ।
