वीरगन्ज, असार ११ । वीरगन्ज महानगरपालिकाले आगामी आर्थिक वर्ष २०२३/२४ का लागि रु तीन अर्ब २१ करोडभन्दा बढी बजेट प्रस्तुत गरेको छ ।
आइतबार महानगरपालिकाको १३ औं महाधिवेशनमा महानगरका मेयर राजेशमान सिंहले वार्षिक राजस्व र खर्चको अनुमान प्रस्तुत गरेका थिए ।
मधेस प्रदेशको एक मात्र महानगरले छुट्याएको बजेटमध्ये चालु खर्चका लागि २ अर्ब ४८ करोड र पूँजीगत खर्चका लागि ६८ करोडभन्दा बढी विनियोजन गरिएको छ । त्यस्तै, आर्थिक व्यवस्थापनका लागि रु ३६ करोडभन्दा बढी विनियोजन गरिएको मेयर सिंहले जानकारी दिए ।
त्यसैगरी आन्तरिक आम्दानीबाट १ अर्ब २० करोडभन्दा बढी, संघीय सरकारबाट १ अर्ब ३ करोडभन्दा बढी आर्थिक हस्तान्तरण हुने र प्रदेश सरकारबाट ४ करोड ४० लाखभन्दा बढी प्राप्त हुने अनुमान छ ।
त्यसैगरी संघीय सरकारको राजस्व वितरणबाट २५ करोड र प्रदेश सरकारको राजस्व बाँडफाँटबाट २५ करोडभन्दा बढीको व्यवस्थापन हुनेछ ।
चालु आर्थिक वर्षमा विनियोजन गरिएको ३ अर्ब ४० करोड रुपैयाँभन्दा बढी रकम आर्थिक वर्षको अन्त्यसम्ममा ७१ प्रतिशत खर्च हुने अनुमान गरिएको छ ।
Published Date: 26 June 2023
