काठमाडौं, जेठ ३१ । दादुराको सङ्क्रमण देशका १६ जिल्लामा फैलिसकेको छ भने एक हजार तीन सयभन्दा बढीमा सङ्क्रमण देखिएको स्वास्थ्य सेवा विभागअन्तर्गतको परिवार कल्याण महाशाखाले सार्वजनिक गरेको प्रतिवेदनमा उल्लेख छ ।
मोरङ, सुनसरी, धनुषा, महोत्तरी, सर्लाही, चितवन, काठमाडौं, कपिलवस्तु, अर्घाखाँची, दाङ, बाँके, बर्दिया, सुर्खेत, कैलाली, कञ्चनपुर, बाजुरालगायत जिल्लामा यो भाइरसको संक्रमण देखिएको छ । कैलाली, सुनसरी र महोत्तरीमा यो रोग सबैभन्दा बढी देखिएको महाशाखाका निर्देशक डा विवेककुमार लालले बताए । बाँकेको नेपालगञ्जमा यो रोगबाट एक जनाको मृत्यु भएको प्रतिवेदनमा उल्लेख छ ।
धनगढी उपमहानगरपालिका, कैलालीको गौरीगंगा नगरपालिका र गोदावरी नगरपालिका, सुनसरीको बर्जु नगरपालिका र महोत्तरीको गौशाला नगरपालिका–२ र ५ जनामा कोरोना भाइरसको संक्रमण देखिएको छ । प्रभावित क्षेत्रमा रोगविरुद्धको खोप अभियान सुरु गरिएको उनले बताए ।
जेठ २३ गते काठमाडौंको गोकर्णेश्वरमा देखिएको रोग नियन्त्रणमा आएको महाशाखाले जनाएको छ । हालसम्म प्रभावित जिल्लाबाट ६ महिनादेखि १५ वर्षसम्मका २ लाख १५ हजार ५४ जनालाई खोप लगाइएको छ ।
बालस्वास्थ्य तथा खोप शाखाले असार २३ गते सुनसरी, मोरङ, महोत्तरी, बर्दिया, दाङ, सुर्खेत, कैलाली, कञ्चनपुर र बाजुरामा दादुरा र रुबेला विरुद्धको खोप अभियान सुरु गरेको हो ।
स्वास्थ्य तथा जनसंख्या मन्त्रालयले रोगविरुद्धको खोप लगाउन सर्वसाधारणलाई आग्रह गरेको छ ।
Published Date: 14 June 2023
