रोजगारीको सुनिश्चितता र आार्थिक समानता हुने राजनैतिक व्यवस्था नै समाजवादी व्यवस्था

 भक्तपुर, जेठ ३० । बागमती प्रदेश शिक्षा तालिम केन्द्र धुलिखेलबाट कक्षा ११ र १२ मा सामाजिक विषय अध्यापन गर्ने माध्यमिक शिक्षकहरुको पेशागत विकास तालिमका विषयगत शिक्षकहरुको टोलीले मंगलबार भक्तपुर नगरको ऐतिहासिक तथा सांस्कृतिक पक्षको जानकारी हासिल गर्ने उद्देश्यले भक्तपुर नगरपालिकाको अध्ययन अवलोकन भ्रमण गरेको छ । टोलीले भक्तपुर नगरपालिकाका प्रमुख सुनिल प्रजापतिसँग भेटी भक्तपुर नपाको शैक्षिक अवस्थाबारे जानकारी लियो ।

भेटका क्रममा नगर प्रमुख प्रजापतिले शिक्षा, स्वास्थ्य, सम्पदा संरक्षण, खानेपानी, विकास निर्माणलगायत जनताका आधारभूत आवश्यकता पूरा गर्दै भक्तपुर नगरपालिकाले नेमकिपाको घोषणापत्रअनुरुप नेपालको संविधानले कल्पना गरेको समाजवादउन्मुख कार्य गर्दै आएको बताए ।

उत्पादनका मुख्य मुख्य साधनहरु सामाजिकीकरण, शिक्षा र स्वास्थ्य उपचारजस्ता जनताका आधारभूत आवश्यकताका विषयहरु निःशुल्क, रोजगारीको सुनिश्चितता र आार्थिक समानता हुने राजनैतिक व्यवस्था नै समाजवादी व्यवस्था भएको बताउँदै उनले भक्तपुर नपाले शिशुस्याहार केन्द्रदेखि विश्वविद्यालय तहसम्मको शिक्षालाई सस्तो र गुणस्तरीय ढंगले प्रदान गर्नेमा जोड दिँदै आएको बताए ।

भक्तपुर नगरपालिकाले नगरपालिकाभित्र सञ्चालित सामुदायिक विद्यालयको भौतिक सुधार तथा शैक्षिक विकासका लागि विद्यालयको आवश्यकताअनुसार आर्थिक सहयोग गर्दै आएको बताउँदै विद्यार्थीहरुको आवश्यकताअनुसार शैक्षिक छात्रवृत्ति र ऋण समेत व्यवस्था गरेको छ बताए ।

उक्त कार्यक्रममा भक्तपुर नपाका प्रमुख प्रशासकीय अधिकृत विजयकुमार शर्माले भक्तपुर नपाको विशेषता र तालिमका सहजकर्ता विष्णुमाया सापकोटाले अध्ययन भ्रमणको उद्देश्यमाथि प्रष्ट पारेका थिए ।

कार्यक्रमका सहभागी शिक्षकहरुले भक्तपुरको सामुदायिक विद्यालयको अवस्था, स्थानीय पाठ्यक्रम ख्वपको पहिचान, नगरको वर्तमान शैक्षिक अवस्था, सामाजिक पक्ष, शिक्षा विकासको रणनीतिक योजना तथा विविध पक्षबारे जिज्ञासा राखेको थियो ।

टोलीमा १३ वटा स्थानीय तहका २५ वटा विद्यालयका सामाजिक विषयका शिक्षक–शिक्षिकाहरुको उपस्थिति थियो ।