भक्तपुरमा विश्व रक्तदाता दिवसको अवसरमा साइकल यात्रा हुने

भक्तपुर, जेठ ३० । विश्व रक्तदाता दिवस जून १४ को अवसरमा बुधबार भक्तपुरमा साइकल यात्रा हुने भएको छ। नेपाल रेडक्रस सोसाईटी भक्तपुर शाखा र नेपाल स्वयंसेवी रक्तदाता समाज भक्तपुर जिल्ला समितिको आयोजनामा सो साइकल यात्रा हुन लागेको हो।

बुधबार बिहान ६ बजे नेपाल रेडक्रस सोसाईटी भक्तपुर शाखाको भवन दुधपाटिबाट सुरू हुने सो साइकल यात्रा भक्तपुरको हाकुफोहिटी , ब्यासी, महालक्ष्मी, कमलविनायक, च्याम्हासिंह, दत्तात्रय, टौमढि, राममन्दिर, सूर्यविनायक, चुनदेवी, सल्लाघारी तीनकुने, चोङ्गा गणेश, सिद्धपोखरी हुँदै भक्तपुर बहुमुखी क्याम्पसमा गएर समापन हुने बताइएको छ। सो साइकल यात्राले जम्मा ८ किलोमिटरको दुरी पुरा गर्नेछ।

साइकल कनेक्ट भक्तपुरको समन्वयमा हुन लागेको सो कार्यक्रममा जुजु बाइक्सको प्राविधिक सहयोग हुनेछ। साइकल यात्रा पछि बिहान ८ बजे देखि सिद्धपोखरी भक्तपुरमा रक्तदान कार्यक्रम सुरू हुने आयोजकले जनाएको छ।