भक्तपुर, जेठ २६ । भक्तपुर जिल्लाका चार नगरपालिकाले बिरामीलाई आवश्यक पर्ने रगतको खर्च व्यहोर्न स्रोतसाधन विनियोजन गरेका छन् ।
यससँगै भक्तपुर, मध्यपुर थिमि, सूर्यविनायक र चाँगुनारायण नगरपालिकाका स्थायी बासिन्दाले निःशुल्क रगत पाउनेछन् ।
जिल्लाका चारवटै नगरपालिकाले यी स्थानीय तहका स्थायी बासिन्दालाई निःशुल्क रगत उपलब्ध गराउन नेपाल रेडक्रस सोसाइटी भक्तपुरसँग सम्झौता गरेका छन् ।
नेपाल रेडक्रस सोसाइटी भक्तपुर शाखाका अध्यक्ष मनोजकुमार थापाले सेवा लिन बिरामीका आफन्तले रगतको आवश्यक पर्ने सिफारिस पत्र र स्थायी बसोबासको आधिकारिक परिचयपत्र बुझाउनुपर्ने बताए ।
रगत सेवाको कुल रकम सम्बन्धित स्थानीय तहले नेपाल रेडक्रस सोसाइटीलाई दिने बताइएको छ । “यसले गरिब जनतालाई धेरै सहयोग गरेको छ,” थापाले भने ।
नेपाल रेडक्रस सोसाइटी, भक्तपुर शाखाले हालसम्म जिल्लाका एक हजार ६५४ व्यक्तिलाई २ हजार पिन्टभन्दा बढी रगत उपलब्ध गराएको छ ।