काठमाडौं, जेठ २० । पोखरा क्षेत्रीय अन्तर्राष्ट्रिय विमानस्थलले छ महिना सञ्चालन गरेपछि पहिलो पटक अन्तर्राष्ट्रिय उडान गर्ने भएको छ । नेपाल नागरिक उड्डयन प्राधिकरणका अनुसार चीनको सिचुवान एयरलाइन्सले छेन्दु–पोखराका लागि दुईवटा चार्टर उडानको प्रस्ताव गरेको छ ।
विमानस्थलका प्रमुख विक्रम गौतमका अनुसार असार २१ गते दुईवटा चार्टर उडान हुनेछन्।“कम्पनीले न्यारोबडी एयरक्राफ्टमार्फत दुईवटा चार्टर उडानको प्रस्ताव गरेको छ । थप विवरण आउन बाँकी छ,’ गौतमले भने ।
सोसाइटी इन्टरनेशनल नेपालको लागि सिचुआन एयरलाइन्सको आधिकारिक टिकटिङ कम्पनी हो। यस विमानस्थलमा बुद्ध, यति, श्री, सौर्यलगायतका वायुसेवा कम्पनीले नियमित उडान भर्दै आएका छन् ।
प्राधिकरणकाका अनुसार हिमालय एयरलाइन्स, जजिरा एयरवेज, सिचुवान एयरलाइन्सलगायतका वायुसेवा कम्पनीहरूले यस विमानस्थलबाट नियमित उडानका लागि सम्भाव्यता अध्ययन गरिरहेका छन् । बुद्ध एयरले यस विमानस्थलबाट भारतका विभिन्न सहरमा नियमित उडानका लागि प्रक्रिया सुरु गरिसकेको छ ।
