विश्व बैंकको सहयोगमा मुग्लिन–मलेखु सडकखण्ड स्तरोन्नति हुँदै

भरतपुर, जेठ २० । नागढुङ्गा–मुग्लिन सडक आयोजना (पश्चिम खण्ड) ले ३९ किलोमिटर मुग्लिन–मलेखु सडकखण्डको विस्तार तथा स्तरोन्नतिको काम शुरु गरेको छ ।

शर्मा जेभीले निर्माणको ठेक्का पाएको र पहिलो चरणमा पाँच किलोमिटर सडक निर्माण भइरहेको आयोजना प्रमुख किरण कार्कीले बताए ।

ठेक्का सम्झौता अनुसार १७ किलोमिटर सडक चितवन जिल्ला र २२ किलोमिटर धादिङतर्फ स्तरोन्नति गरिने छ ।

बजार क्षेत्रका फुटपाथ, सडक डिभाइडर र बिजुलीका पोलसहित सडक चारदेखि छ लेनको हुने कार्कीले बताए । मलेखु, शितलबजार, बेनीघाट, विशालटार, माझिटार, फिस्लिङ, कुरिनटार, लेवाटार, रमाइलो डाडा र मुग्लिनमा पनि १० ओभरहेड ब्रिज निर्माण गरिने भएको छ ।

त्यसैगरी रुटमा ६ वटा पुल पनि निर्माण गरिने भएको छ । गोमती खोला, चरौदी खोला, खतौनी खोला, हुग्ली खोला, मौवा र बरबाङ खोलामा पुल निर्माण गरिनेछ ।

आयोजनाको कुल लागत ४ अर्ब ८ करोड रुपैयाँ छ ।

आयोजनाले सडक चौडा गर्न करिब ३५० रुख काट्ने लक्ष्य राखेको छ । ‘हामीले पहाड खन्नेभन्दा खोला किनारमा पर्खाल बनाउनलाई प्राथमिकता दिएका छौं’, कार्कीले भने, ‘कम्तीमा २० वर्षसम्म टिक्ने खालको सडकको डिजाइन बनाइएको हो ।

यो सडक खण्ड संघीय राजधानीबाट भित्रिने र बाहिरिने प्रमुख मार्ग भएकाले समयमै आयोजना सम्पन्न गर्न निर्माण कम्पनीले तीव्र गतिमा काम गरिरहेको छ ।

विश्व बैंकको आर्थिक सहयोगमा सडक निर्माण हुन लागेको हो ।